لیژنەی ئاسایش و بەرگریی پەرلەمانی عێراق لێکۆڵینەوە لە هێرشەکەی سەر فڕۆکەخانەی سلێمانی دەکات

 

ئەمڕۆ یەکشەممە، 09-04-2003، سەگڤان یوسف، جێگری سەرۆکی لیژنەی ئاسایش و بەرگریی پەرلەمانی عێراق بە رادیۆی رووداوی گوت، لەسەر داوای موحسین مەندەلاوی، جێگری یەکەمی سەرۆکی پەرلەمان، لیژنەیەکی لێکۆڵینەوە لە رووداوی هێرشی سەر فڕۆکەخانەی نێودەوڵەتیی سلێمانی پێکهاتووە و سبەی سەردانی پارێزگاکە دەکات.

 

جێگری سەرۆکی لیژنەی ئاسایش و بەرگریی پەرلەمانی عێراق گوتیشی، لیژنەکەیان لێکۆڵینەوە لە رووداوەکە دەکات و لەگەڵ بەرپرسانی ئەمنی و ئیداریی سلێمانیش کۆدەبنەوە بۆ بەدواداچوونی رووداوەکە.

 

موحسین مەندەلاوی، جێگری یەکەمی سەرۆکی پەرلەمانی عێراق رۆژی شەممە، 08-04-2023، لە تویتێکدا لە هەژماری تویتەری خۆی گوتی: "داوا لە لیژنەی ئاسایش و بەرگریی دەکەین لیژنەیەکی لێکۆڵێنەوە پێکبهێنێت بە مەبەستی هەڵوەستەکردن لەسەر ئەو هێرشە و بەپەلە راپۆرتی خۆی پێشکێش بکات تاوەکو رێکار بگرنەبەر بۆ پاراستنی سەروەری و پارێزگاریکردن لە گیانی گەلەکەمان لە هەر هێرشێکدا".

 

بە گوتەی سەگڤان یوسف، دوای سەردانیان بۆ سلێمانی، لیژنەکەیان راپۆرتێکی دەبێت و پێشکێش بە سەرۆکایەتیی پەرلەمانی عێراقی دەکات لەبارەی رووداوەکەوە.

 

هاوکات دوێنی شەممە، شاندێکی باڵای سەربازی و ئەمنیی عێراق بە سەرۆکایەتیی قاسم ئەعرەجی، راوێژکاری ئاسایشی نیشتمانیی عێراق و عەبدولوەهاب ساعدی، سەرۆکی دەزگای دژەتیرۆری عیراق گەیشتنە سلێمانی بۆ لێکۆڵینەوە و بەدواداچوونی رووداوی هێرشی سەر فڕۆکەخانەی نێودەوڵەتیی سلێمانی.

 

قاسم ئەعرەجی، راوێژکاری ئاسایشی نیشتمانیی عێراق دەڵێت، حکومەتی عێراق دژی پێشێلکردنی سەروەرەریی وڵاتە و ئاماژە بەوەش دەکات کە لە رێگەی چەند شاهێدحاڵێکەوە گوێبیستی وردەکاریی رووداوەکەی سلێمانی بووە.