بەدواداچوونی رووداو: مانگانە داخستنی فڕۆکەخانەی سلێمانی لەم وەرزەدا زیان بە 20 هەزار گەشتیار دەگەیێنێت

 

ستار حەمەسەعید، هاونیشتمانییەکی سلێمانییە و هەڵگری وڵاتینامەی بەریتانیایە، دەڵێت: "ئێمە گرفتى ئەوەمان بۆ دروستبووە کە دوو لە تیکێتەکانمان بڕیبوو، ئێستا لە سلێمانییەوە رێگە نییە، جگە لەوەى دوا دەکەوین و منداڵەکان قوتابخانەیان دەفەوتێت، تیکتیش نزیکەى 35% گرانبووە."

 

ئێستا فڕۆکەخانەى سلێمانى نزیکەی نیوەی ژمارەى گەشتەکانى راگیراون؛ لەوانە: تورکیش ئێرلاین 11 گەشتی چوون و هاتن، کۆندۆر دوو گەشتی چوون و هاتن (دۆسڵدۆرف)، عێراقییە: سێ گەشت، گەشتێکی تایبەتی گەشتیاریی پێگاسۆسی تورکی. 

 

گەشتە بەردەوامەکانی هەفتانە لە فڕۆکەخانەکە بەمشێوەیەن: 

 

قەتەر ئێرلاین: 7 گەشتى چوون و هاتن

فلاى دووبەى: 3 گەشت

ماهانى ئێرانى: 3 گەشت

رۆیاڵى ئوردنى: 3 گەشت

عێراقییە: 12 گەشت (لوبنان، میسر، دووبەى و بەغدا)

 

ئارام ئەحمەد، بەڕێوەبەرى هێڵەکەیە و دەیەوێت نیگەرانیی خەڵک لەسەر کاروبارى هێڵەکەیان لە سلێمانى بەوە بڕەوێنێتەوە کە بڕیارەکە حکومى و سیاسییە و لەسەرووى ئەوانەوە دراوە. ئەو بە تۆڕی میدیایی رووداوی گوت: "ئێمە لە 26ـی ئادارەوە گەشتەکانمان لە 7 گەشتەوە زیادکرابوو بۆ 11 گەشتى چوون و هاتنەوەى هەفتانە، رۆژانە نزیکەى 150 گەشتمان هەبوو، هەرکات حکومەت بڕیارى کردنەوەیدا، ئێمە دەست پێدەکەینەوە."

 

پارێزگارى سلێمانى، نووسراوى روونکردنەوەى خۆیانى بۆ ئەنجوومەنى وەزیرانى هەرێمى کوردستان، حکومەتى عێراقى و هاوپەیمانان ناردووە و چاوەڕێى روونکردنەوەى ئەوانیشە.

 

هەڤاڵ ئەبوبەکر، پارێزگارى سلێمانى رایگەیاند، "فڕۆکەخانەى سلێمانى مەدەنى و نێودەوڵەتییە و هیچ کێشەیەکى نییە، داواشمان کردووە کە ئەو رووداوەى دوێنێ [هێرشکردنە سەر فڕۆکەخانە] جارێکى دیکە دووبارە نەبێتەوە."

 

زۆرینەى ئەو گەشتانەى راگیراون، کاتەکانیان دەکەوێتە نیوەشەو یان بەرەبەیان، هەر بۆیە ئەوانەى پەنا بۆ فڕۆکەخانەى هەولێر و کەرکووک دەبەن، دەبێت رۆژێک پێشتر یان دەمەوئێوارە بەڕێبکەون.

 

بەپێی بەدواداچوونی رووداو، لە وەرزێکی گەشتیاریی وەکو ئێستا [مانگی نیسان] مانگانە نزیکەی 20 هەزار گەشتیاری چوون و هاتن بەهۆی داخستنی فڕۆکەخانەکە زیانیان پێدەگات. لە وەرزی گەشتیاریی هاوینەش، ژمارەکان دەبنە دوو و هەندێکجاریش سێ هێندە.