عیرفان عەبدولعەزیز: کوردەکانی ناو تەحریر شام پێیانگوتم 'جۆلانی زۆر خۆشی دەوێی'

ئەمڕۆ یەکشەممە، 08ـی کانوونی یەکەمی 2024، عیرفان عەبدولعەزیز، رابەری بزووتنەوەی ئیسلامیی کوردستان بە نزار جەزا، پەیامنێری تۆڕی میدیایی رووداوی راگەیاند، "پێشتر مەکتەبمان هەبووە لە دیمەشق و ئاگاداری بارودۆخی سووریاین."

 

رابەری بزووتنەوەی ئیسلامیی کوردستان گوتی، "وەکو هەموو موسڵمانانی جیهان ئێمەش خۆشحاڵبوون بە کۆتاییهاتنی رژێمی بەشار ئەسەد و بەیاننامەیەکمان بڵاوکردەوە و بە چەند خاڵێک ئامۆژگاری ئەو بەڕێزانەی ئەوێمان کرد."

 

سەبارەت بە کوردی سووریا، عیرفان عەبدولعەزیز گوتی، "پێویستە زۆر بە عاقڵانە هەڵسوکەوت بکەن و خۆیان بگونجێنن. بچنە ناو ئەو حکومەتەی لەوێ هەیە، واز لە شیکردنەوەی هەڵە بهێنن."

 

 

 

عیرفان عەبدولعەزیز: ئەو ئێمە لە دوورەوە دەناسێت، بەڵام وەکو پەیوەندی، پەیوەندیمان نەبووە بەهۆی دووریمانەوە.

 

 

عیرفان عەبدولعەزیز: من قسەم لەگەڵ خەڵکێکی کوردی ناو تەحریری شام کرد، ئەوان پێیا گوتین کە شێخ ئەحمەد شەرع، جەنابت دەناسێت و خۆشیدەوێت و حەزدەکەین نامەی بۆ بنووسیت منیش گوتم بەسەرچاو.

 

 

عیرفان عەبدولعەزیز: باوڕناکەم ئەوان کێشەیان لەگەڵ کورد هەبێت، بەڵام کوردیش بەڕاستی نابێت شیکردنەوەی هەڵە بکات، ئێمە چەندەها جار وەکو کوردستان ئامۆژگاری پەکەکەمان کردووە کە شیکردنەوەی هەڵە نەکەن، دوایین جار کە ئەم تەقینەوە بوو لە ئەنقەرە، پەیەدە پێش ئێمە ئیدانەی کرد کاتێک ئێمە ئیدانەمان کرد، پێشبینیمان نەدەکرد پەکەکە خۆی بکات بە خاوەنی، کەچی خۆی کرد بە خاوەنی لە کاتێکدا درێژە بە پڕۆسەی ئاشتی دەدرا لەوێ، یاخود دەیانگوت ئەردۆغان دەکەوێت و ئیمپڕاتۆریەتێکی کوردی دروست دەبێت کەچی پێچەوانەکەی راستبوو، بۆیە ئەم شیکردنەوەی هەڵانە خراپن، ئێستا ئەو ئەزیزانەی کە لەوێن پێویستە بە عاقلانە هەڵسوکەوت بکەن و بچنە ناو ئەو حکومەتەی کە لەوێ هەیە و واز لەو شیکردنەوەی هەڵانە بهێنن.

 

 

عیرفان عەبدولعەزیز: بۆ مەسەلەی ئۆتۆنۆمی نازانم کە سیستمی حکوم لەوێ چۆن دەبێت، هێشتا ئەمە سەرەتایە، جارێ بۆ ئەوان پێشینە ئەوەیە بزانن ئەمنی وڵاتەکەیان چۆن دەبێت، ئەوەی کە باسدەکرا وڵاتێک بۆ عەلەوییەکان و وڵاتێک بۆ سوننەکان ئەوە نەما، ئێستا چوونەتە ناو تەرتووس، لازقیە و دەوڵەتی عەلەویش نەما، جا لەبەرئەوە باوەڕناکەم هیچ دەوڵەتێک نە ئەمریکا نە رووسیا و نە ئەورووپا بهێڵین سووریا دابەشبکرێت، بۆیە کوردەکانی ئەوێ دەبێت زۆر بە عاقڵانە هەڵسوکەوت بکەن؛ جا مەسەلەی کوردستانی ئەوێ زۆر جیاوازە لە کوردستان ئێرە و تورکیا و ئێران هەموو بەیەکەوە نییە، جیاوازن و لە یەک شوێن نین، بۆیە دەبێ بە عاقڵانە خۆیان بگونجێنن.

 

 

عیرفان عەبدولعەزیز: چەندەها جار هەوڵمانداوە و پەیاممان داوە بە جەمیل بایک، بۆ ئەوەی بەم شێوەیە هەڵسوکەوت نەکەن و لەگەڵ تورکیا رێکبکەون، ئەوەتا ئێران و رووسیا بای بایان نەکرد لە بەشار ئەسەد! ئەو شەوە سەکتە (جەڵتە) لێیبدایە باشتر بوو کە گوتیان بڕۆ خواحافیزت بێت و ناتوانین بەرگریت لێبکەین. ئەی ئێستا ئەمریکا چۆن دێت بەرامبەر بە 21 ملیۆن کەس بووەستێت؟ ناوەستێت. ئەواتە دوێنێ لەبەردەم رووسیا؛ ئێران هاتووەتە ئەو ناوچە کوردستانیانەوە لە قامشلۆ و حەسەکە، بەیانی دیمەشقی هەبێت چۆن لەوێ دادەنیشێت؟ دەڕوات بۆ ئەوێ‌. لەبەرئەوە دەبێت بە عاقڵانە هەڵسوکەوت بکەن، ئێمەش ئامادەین رۆڵی خێر ببینین لە نێوانیاندا، مەزڵووم عەبدی خۆشی گوتی، تاوەکو ئێستا شەڕ نەکەوتووەتە نێو دەستەی تەحریری شام و ئەوان، ئەو شەڕەی کە هەیە ئەوەی سوپای ئازادە، جا ئەوان ئێستا دەتوانن بە عاقڵانە هەڵسوکەوت بکەن و بچنە ناو ئەو دەوڵەتە تازەیەی کە هەیە؛ خۆیان نەکەن دووژمنیان.

 

 

عیرفان عەبدولعەزیز: ئەوەتا ئێستا ئێران دەڵێت 'من ئامادەم لەگەڵ جۆلانی پەیوەندی ئاسایی بکەمەوە'، ئەمە ئێران جا چ بگات بە ئەمریکا و وڵاتانی دیکە، ئەمە رێسایەکی سیاسییە لە سیاسەت ئەخلاق نییە و مەسلحەت هەیە.

 

 

عیرفان عەبدولعەزیز: ئەوە یەکێکە لەم پرسیارانەی کە ئەم چەند مانگە بۆ هەیئەی تەحریری شام زۆر سەخت دەبێت، بۆیە دەبێت بە عاقڵانە هەڵسوکەوت بکات، چۆن تائێستا بە عاقڵانە هێناویانە و حەقیان لە کەس نەسەندووە، ئەوەتا وەزیرەکان و رەئیس وەزیری سووریا لە شوێنی خۆیان دانیشتوون کەس نەیگوتووە کە بۆ وادەکەن، ئەسڵەن گوتوویەتی رێزیان بگرن و با دەوامی خۆیان بکەن، ئەم عەقڵە زۆر گرنگە. بزووتنەوەی ئیسلامی گۆڕانکارییەکی گەورە بەسەر بیرکردنەوەیدا هاتووە، ئەوەی ساڵی 1990 نین، بەڵکو بە عاقڵانە راستییەکان دەبینێت و هەر بەو شێوەیەش هەڵسوکەوت دەکات، ئەگەر بەمشێوەیە بڕوات ئەوا وڵاتان دەیانەوێت سووریا بەرەو ئەمن و جیگیری بڕوات و نایانەوێت بەرەو و فەوزا بڕوات.

 

 

عیرفان عەبدولعەزیز: خۆی هەموو کات سیستمی سیاسی عورف و دەرهاوێشتەی خەڵکەکەیە، ئێستا لە ئەفغانستان خەڵکەکە ئەو سیستمەی دەوێت، لە ئەمریکا بە هەمان شێوە، سووریا ولاتێکە کە شارستانییەتێکی گەورەی هەیە، بۆیە پێموایە سیستمێکی جوانی دەبێت نە 100٪ ئیسلامی دەبێت و نە دیموکراتی و عەلمانی، سیستمێکی جوان دەبێت.