لە هەرێمی کوردستان تووشبوون بە کۆرۆنا بە رێژەی 63% بەرزبووەتەوە
لە هەرێمی کوردستان لە کۆی هەزار و 312 تووشبووی ڤایرۆسی کۆرۆنا 828 تووشبوویان لە نەخۆشخانەکانی هەولێر، سلێمانی و هەڵەبجە و دهۆکدان. بەپێی دوایین ئاماری وەزارەتی تەندروستیش تووشبوون بە کۆرۆنا بە رێژەی 63% بەرزبووەتەوە.
بەپێی ئامارەکانی وەزارەتی تەندروستیی هەرێمی کودستان، لە 01-03-2020ـەوە تاوەکو 07-06-2020، هەزار و 312 کەس تووشی کۆرۆنا بوون، لەو ژمارەیە 26 کەسیان گیانیان لە دەستداوە و 458 تووشبوو چاکبوونەتەوە و گەڕاونەتەوە ماڵەوە، بەڵام ژمارەی ئەو تووشبووانەی پێویستیان بە خەواندنە لە نەخۆشخانەکان روو لە زیادبوونە.
لە ئامارەکەی وەزارەتی تەندروستیدا دەردەکەوێت، ژمارەی تووشبووانی کۆرۆنا لە هەرێمی کوردستاندا کە چاکبوونەتەوە بۆ 35٪ دابەزیوە، 2%ـی گیانیان لەدەستداوە و رێژەی تووشبووان 63%ی بەرزبووەتەوە کە ئێستا لە هەشت نەخۆشخانەی کۆرۆنا لەژێر چارەسەردان.
ئەوە لەکاتێکدایە لە 23-04-2020 بەگوێرەی ئاماری وەزارەتی تەندروستی، 92.58%ی تووشبووانی کۆرۆنا لە هەرێمی کوردستان چاکببوونەوە، گیانلەدەستدان 1% بوو، تەنیا لە 6.42%ی تووشبووان لە نەخۆشخانەکاندا مابوون. هەروەها لە 52%ی تووشبووانی کۆرۆنا مێ و 49%یش نێر بوون. ئێستا 42%ی تووشبووانی کۆرۆنا مێ و 58%یش نێرن.
هەر بەپێی ئامارەکانی وەزارەتی تەندروستیی هەرێمی کوردستان، لە 14-05-2020 بەدواوە ئامارەکانی تووشبووانی کۆرۆنا و گیانلەدەستدان رووی لە هەڵکشان کردووە.
لەو 828 تووشبووەی ڤایرۆسی کۆرۆنا کە لە نەخۆشخانەکانی هەرێمی کوردستاندا ماون، 140 تووشبوویان لە هەولێر، 609 تووشبوو لە سلێمانی، 76 تووشبووشیان لە دهۆک و سێ تووشبووشیان هەڵەبجەن.
کۆرۆنا لە هەرێمی کوردستان
تووشبوو: 1312 کەس
چارەسەرکراو: 458 کەس
گیانلەدەستدان: 26 کەس
ئەوانەی لە نەخۆشخانەن: 828 کەس
بەپێی پارێزگاکان:
هەولێر
تووشبوو: 387 کەس
چاکبووەوە: 243 کەس
گیانلەدەستدان: 4
ئەوانەی لە نەخۆشخانەن: 140 کەس
سلێمانی
تووشبوو: 796 کەس
چاکبووەوە: 167 کەس
گیانلەدەستدان: 22 کەس
ئەوانەی لە نەخۆشخانەن: 609 کەس
دهۆک
تووشبوو: 102 کەس
چارەسەرکراو: 26 کەس
گیانلەدەستدان: 0
ئەوانەی لە نەخۆشخانەن: 76 کەس
هەڵەبجە
تووشبوو: 25 کەس
چارەسەرکراو: 22 کەس
گیانلەدەستدان: 0
ئەوانەی لە نەخۆشخانەن: 3 کەس