بەبۆنەی 100 رۆژی کارکردنی کابینەی نۆیەم مەسروور بارزانی گوتارێک پێشکێش دەکات

 

نووسینگەی سەرۆکوەزیرانی هەرێمی کوردستان رایدەگەیێنێت، مەسروور بارزانی، سەرۆکوەزیرانی هەرێمی کوردستان لە گوتارەکەیدا کە بڕیارە کاژێر 20:00 ـی ئەمڕۆ لە کەناڵەکانی راگەیاندن پەخش بکرێت، باسی دەسکەوتەکانی کابینەی نۆیەمی حکومەتی هەرێمی کوردستان لە ماوەی سەد رۆژی کارکردنیدا دەکات.

 

رۆژی 4-12-2019 سەد رۆژی کارکردن بەسەر کابینەی نۆیەمی حکومەتی هەرێمی کوردستان تێپەڕی. سەرۆکوەزیرانی هەرێمی کوردستان لە گوتارەکەیدا باسی ئەم تەوەرانە دەکات:

 

- پرۆسەی چاکسازیی کارگێڕی و دارایی

 

- رووبەڕووبوونەوە و سنوورداركردنی گەندەڵی 

 

- گەشەپێدانی وەبەرهێنان و پێشخستنی ژێرخانی ئابووری 

 

-باشترکردنی پەیوەندی و چارەسەرکردنی کێشەکان لەگەڵ حکومەتی فیدراڵی لە بەغدا

 

نووسینگەی سەرۆکوەزیرانی هەرێمی کوردستان هەروەها رایدەگەیێنێت: "لەگەڵ گوتارەکەی سەرۆکوەزیرانی هەرێمی کوردستان، بڕیارە راپۆرتێکی پڕ لە وردەکاری و زانیاریی تایبەت بە سەد رۆژی کارکردن لەلایەن حکومەتی هەرێمی کوردستانەوە لە دەزگاکانی راگەیاندن بڵاو بکرێتەوە".