بەڕێوەبەری ناحیەی زێلکان: لە سنووری باشیک سێ کاتیۆشا ئاراستەی بنکەیەکی تورکیا کران

رووداو دیجیتاڵ

بەڕێوەبەری ناحیەی زێلکان رایگەیاند، کاژێر 20:30 خولەکی ئەمشەو یەکشەممە 07-11-2021 لە سنووری باشیک سێ کاتیۆشا ئاراستەی بنکەیەکی سەربازیی تورکیا کراون.

محەممەد ئەمین غەریب، بەڕێوەبەری ناحیەی زێلکان بە رووداوی راگەیاند، "یەکێک لە کاتیۆشاکان کەوتووەتە نێو بنکە سەربازییەکەی تورکیا و زیانەکانی نازانرێت. یەکێکی دیکەیان بە نزیک گوندی شەرەف حەیران کەوتووە و ھیچ زیانی نەبووە، ئەوی دیکەشیان لە چۆڵەوانیدا کەوتووەتە خوارەوە و بێ زیان بووە".

بەڕێوەبەری ناحیەی زێلکان ئاماژەی بەوەش کرد، نازانن کێ و لە کوێوە کاتیۆشاکان ئاراستە کراون، بەڵام ئەمە چەندین جارە لە ئەمساڵدا ئەو بنکە سەربازییەی تورکیا بۆردوومان دەکرێت.

تورکیا لە ساڵی 2015وە بنکەیەکی سەربازیی لە باشیک داناوە لە دەشتی نەینەوا و پێشتر چەندجارێک لەلایەن گرووپی سەر بە حەشدی شەعبی بۆردوومان کراوە.