رێگرییەکانی حکومەتی عێراق سەوزە و میوەی هەرێمی کوردستان ناگرێتەوە

 

 

هۆشیار جەلیل، بەرپرسی چاودێریی گومرگی کشتوکاڵ لە هەولێر ئەمڕۆ چوارشەممە 07-08-2024 بە تۆڕی میدیایی رووداوی گوت، "رێگرییەکە سەوزە و میوەی هەرێمی کوردستانی نەگرتووەتەوە و ئێستاش رۆژانە 200 بۆ 300 بارهەڵگر لە بەرهەمی نێوخۆ دەنێرینە نێوەڕاست و خوارووی عێراق".

 

هۆشیار جەلیل گوتی، هەر بارێکی سەوزە و میوە بنێردرێت، ئەگەر پشتگیری کشتوکاڵی هەولێری هەبێت، لە بازگەکان رێگری لێناکرێت؛ گوتیشی، "ئەو بارهەڵگرانەی میوەی تورکیا و ئێرانیان پێ بێت بێ گومرگ رێگەیان پێنادرێت".

 

بەهۆی بچووکی عەلوەی هەڵەبجەوە زۆرینەی بەرهەمەکانی پارێزگاکە دەبرێنە عەلوەکانی سلێمانی. سەروەر عەلی، بەرپرسی سەندیکای عەلوەی سلێمانی ئەمڕۆ چوارشەممە بە تۆڕی میدیایی رووداوی گوت، "ئێستا رۆژانە نزیکەی 800 تۆن بەرهەمی نێوخۆ دەنێرینە پارێزگاکانی دیکەی عێراق و هیچ کێشەیەکیان بۆ دروستناکرێت".

 

سەروەر عەلی گوتی، بەرهەمی نێوخۆیی پشتگیریی کشتوکاڵی بۆ دەکرێت و ئێستا داواکراوە سەندیکای عەلوەش پشتگیرییان بۆ بکەن؛ ئاماژەی بەوەشکرد، "رێگە بە هیچ بەرهەمێکی هاوردەکراو بۆ هەرێمی کوردستان نادرێت بێ گومرگ ببرێتە نێوەڕاست و خوارووی عێراق".

 

هەر ئەمڕۆ چوارشەممە، ئەحمەد جەمیل، بەڕێوەبەری گشتیی کشتوکاڵی دهۆک بە تۆڕی میدیایی رووداوی گوت، "ئاستەنگ بۆ هەناردەکردنی سەوزە و میوەی سنوورەکەمان بۆ پارێزگاکانی دیکەی عێراق دروستنەکراوە و بێ کێشە کارەکان بەڕێوەدەچن".