وەزارەتی پەروەردە بۆ قوتابخانەکان: رۆژی ئاڵا کاژێرێک تاقیکردنەوەکان دوابخەن

 

لە فەرمانە وەزارییەکەدا کە واژۆی ئالان حەمە سەعید، وەزیری پەروەردەی لەسەرە و رۆژی، 5-12-2022، رەوانەی پەروەردەکان کراوە، دوو فەرمان دەرکراون. یەکێکیان تایبەتە بە رۆژی ئاڵا و ئەوی دیکەش تایبەتە بە بۆنە تایبەتەکانی کریستیان و کوردانی ئێزدیی دانیشتووی هەرێمی کوردستان.

 

رۆژی سێشەممە، 6-12-2022، دڵشاد عومەر، بەڕێوەبەری پەروەردەی سلێمانی سەبارەت بە دواخستنی تاقیکردنەوەکان و ئەنجامدانی رێوڕەسم لە رۆژی ئاڵادا بە تۆڕی میدیایی رووداوی گوت: "بڕیارێکی پێویستە کە دراوە و نووسراوەکە بە فەرمی بە ئێمەش گەیشتووە".

 

دەقی نووسراوەکەی وەزیری پەروەردە: 

 

- لەبەر بەرژەوەندیی قوتابییانی هەردوو پێکهاتەی (ئێزدی و کریستیان) بڕیارماندا بە:

 

پێدانی دەسەڵات بە بەڕێوەبەری ئەو قوتابخانانەی قوتابیی ئەو دوو پێکهاتەیە تێیدا دەخوێنن، خشتەی تاقیکردنەوەکانی کۆتایی وەرزی یەکەم بە جۆرێک رێکبخەن کە گونجاو بێت لەگەڵ جەژن و بۆنەکانیاندا، دەسەڵاتیان هەیە پێش دەستپێکی رێککەوتی تاقیکردنەوەکان کە رۆژی (14-12-2022) دەستپێدەکات، خشتەی تاقیکردنەوەکان رێکبخەن و تاقیکردنەوە ئەنجام بدەن، یان بەهەر جۆرێک بێت خشتەی تاقیکردنەوەکانیان دابنێن کە بۆیان گونجاوە لەگەڵ بۆنە و ئامادەسازیی جەژندا.

 

- لەبەر ئەوەی رۆژی ئاڵای کوردستان رێککەوتی 17-12ـەیە و ئەو رۆژەش تاقیکردنەوەکانی کۆتایی وەرزی یەکەمی تێدا بەڕێوەدەچێت، سەرجەم قوتابخانە و خوێندنگەکان یەک کاژێر پێش دەستپێکی تاقیکردنەوەی ئەو رۆژە رێوڕەسمی ئاڵا ئەنجام بدەن و تەنیا ئەو رۆژە یەک کاژێر تاقیکردنەوەکان درەنگتر بکەن.

 

پەرلەمانی کوردستان بە بریاری ژمارە (48) له رێککەوتی (19-06-2004) رۆژی 17ـی 12ـی هەموو ساڵێکی وەک رۆژی هەڵکردنی ئاڵای کوردستان و هاوکات رۆژی دایک لە کوردستان دیاریکرد. لە ساڵی 1999 بە بڕیارێک لە پەرلەمانی كوردستان ئەو ئاڵایە بە ئاڵای فەرمیی حكومەتی هەرێمی كوردستانی ناساند.