مەسرور بارزانی بۆ هەڤاڵ ئەبوبەکر: هیوادارم هەمیشە بەم رووحیەتە بەردەوام بن لە خزمەتی کوردستان

 

 

ئەمڕۆ چوارشەممە 6ی تشرینی یەکەم مەسرور بارزانی، سەرۆکی حکومەتی هەرێمی کوردستان لە نووسراوێکدا، کە بۆ پارێزگاری سلێمانیی ناردووە، دەڵێت، "لەبەر ئەنجامدانی ئەرکەکانتان بە شێوازێکی رێکوپێک و دڵسۆزانە وەکو پارێزگاری سلێمانی، سوپاس و پێزانینی خۆمان ئاراستەی بەڕێزتان دەکەین."

 

سەرۆکی حکومەتی هەرێمی کوردستان راشیگەیاند، "هیوادارم هەمیشە بەم رووحیەتە بەردەوام بن لە خزمەتی کوردستان."

 

هەڤاڵ ئەبوبەکر، پارێزگاری سلێمانی بە تۆڕی میدیایی رووداوی راگەیاند، "ئێمە سوپاس و پیزانینمان هەیە بۆ سەرۆکی حکومەتی هەرێمی کوردستان، ئەمە پشتیوانییەکی گەورەیە بۆ هەموو دامودەزگاکانی پارێزگای سلێمانی، کە بەم شێوەیە هەڵسەنگاندنیان بۆ ئێمە کردووە."

 

پارێزگاری سلێمانی گوتی، "ئێمە لێرە و ئەوانیش لە حکومەتەوە، بەیەکەوە بەردەوام کار دەکەین بۆ ئارامی، سەقامگیری و ئاسایشی هەرێمی کوردستان، ئەم نووسراوەی سەرۆکی حکومەتی هەرێمی کوردستان بە واتای بەیەکەوە کارکردن و یەک تیمی دێت."

 

هەڤاڵ ئەبوبەکر، بەربژێری بزووتنەوەی گۆڕان لە رۆژی 4ی کانوونی یەکەمی 2017وە بووەتە پارێزگاری سلێمانی و تاوەکو ئێستا لە کارەکانی بەردەوامە.