هاوکاریی هاوپەیمانان بەسەر 19 هەزار پێشمەرگەدا دابەش دەکرێت

 

 

ئەمڕۆ یەکشەممە 6ی ئەیلوولی 2024، سەرچاوەیەکی ئاگادار بە تۆڕی میدیایی رووداوی راگەیاند، پارەی هاوپەیمانان بۆ هاوکاریی وەزارەتی پێشمەرگە خراوەتە سەر هەژماری حکومەتی هەرێمی کوردستان و رۆژی سێشەممە 8ی ئەم مانگە دابەش دەکرێت.

 

ئەمریکا ساڵانە لە چوارچێوەی هاوکارییەکانی وەزارەتی بەرگری بۆ بەرەنگاربوونەوەی داعش و تیرۆر، هاوکاریی ئەو هێزانە دەکات کە هاوبەشی ئەمریکا و هاوپەیمانانن لە بەرەنگاربوونەوەی داعش، لەنێویاندا هێزەکانی پێشمەرگە، هێزە عێراقییەکان و هێزەکانی سووریای دیموکرات - هەسەدە.

 

بەگوێرەی زانیارییەکانی رووداو، ئەو پێشمەرگانەی لە لیوا هاوبەشەکان لە هاوکارییەکە سوودمەند دەبن، ژمارەیان نزیکەی 19 هەزار پێشمەرگەیە و هاوکارییەکە لە رێگەی پڕۆژەی (هەژماری من)ەوە بە شێوەی ئەلیکترۆنی وەردەگرن.

 

وەکو پشتیوانییەک بۆ پێشمەرگە و یەکخستنەوەی یەکجاریی هێزەکانی پێشمەرگە، هاوپەیمانان مانگانە نزیکەی 25 ملیۆن دۆلار دەدەنە وەزارەتی پێشمەرگە، ئەوەش وەک هاوکاریکردنی لیوا هاوبەشەکان. 

  

بەشێک لە هێزەکانی پێشمەرگە لەو هاوکاریانە بێبەشکراون. 4-9-2024 وەزارەتی پێشمەرگە لە راگەیێندراوێکدا روونکردنەوەی لەبارەوە بڵاوکردەوە و رایگەیاند: "ئەم گرفتە هیچ پەیوەندیێکی بە بڕیارەکانی وەزارەتی پێشمەرگەوە نییە، بەڵکو راستەوخۆ پەیوەندیدارە بە شێوازی کارکردن و پێدانی هاوکاریی هاوپەیمانان بە یەکە سەربازییەکان."

 

لە روونکردنەوەکەدا هەروەها هاتبوو: "گرفتی ئەم یەکە سەربازییانەش، پەیوەستە بە هەبوونی رۆتینێکی ئەمنیی هێزەکانی هاوپەیمانان، لەم بارەیەشەوە وەزارەتی پێشمەرگە هەنگاوی پێویستی ناوە و کاری جدی لەسەر کردووە."

 

وەزارەتەکە راشیگەیاند، چاوەڕوانی بڕیاری هاوپەیمانان دەکەن بۆ رێکخستنەوە و چۆنیێتیی دابەشکردنی هاوکاریەکانیان بۆ یەکەکانی سەر بە وەزارەتی پێشمەرگە.