کەشناسی: خۆڵبارین کۆتایی دێت

 

 

رۆژی دووشەممە 6ی ئاداری 2023 دیلان رەشاد، گوتەبێژی وەزارەتی گواستنەوەی هەرێمی کوردستان بە تۆڕی میدیایی رووداوی گوت، سبەی نمە باران لە ناوچە شاخاوییەکانی باکووری رۆژهەڵاتی هەرێمی کوردستان دەبارێت و لە کاتەکانی دوای نیوەڕۆدا کەش جێگیر دەبێت؛ هەروەها لە هەندێک ناوچەى سنوورى پارێزگاى سلێمانى تەرزە دەبارێت.

 

لەبارەی خۆڵبارینەوە، دیلان رەشاد گوتی، خۆڵبارین بەهۆی خێرایی باوە بووە و لە کاتەکانی ئێوارەی ئەمڕۆوە کاریگەرییەکەی کەم دەبێتەوە.

 

ئاراس جەبار، شارەزای کەشناسی ئەمڕۆ دووشەممە بە تۆڕی میدیایی رووداوی گوت، "لەدوای نیوەڕۆوە خۆڵبارین زیاتر دەبێت، بەتایبەت لە سلێمانی، کەرکووک و گەرمیان؛ لە ناوچەکانی دیکەش لاواز دەبێت، خۆڵبارینیش بەگشتی ئەمشەو تاوەکو بەرەبەیان کۆتایی دێت."

 

سەبارەت بە بارانبارینیش ئەو کەشناسە ئەوەی خستەڕوو، "لەدوای نیوەڕۆی ئەمڕۆوە شەپۆلێکی بارانبارین سنووری ئیدارەی سۆران دەگرێتەوە و لە شەودا کاریگەریی بۆسەر ناوچەکانی دیکەش دەبێت و لە هەندێک شوێن نمە باران دەبارێت". گوتیشی، "رۆژی چوارشەممە شەپۆلێکی بارانبارین پارێزگاکانی سلێمانی و هەڵەبجە و ئیدارەکانی گەرمیان و راپەڕین دەگرێتەوە، بەڵام لە هەولێر و دهۆک لاواز دەبێت."

 

 

هەولێر: 18 پلەی سیلیزی

سلێمانی: 17 پلەی سیلیزی

دهۆک: 17 پلەی سیلیزی

کەرکووک: 21 پلەی سیلیزی

هەڵەبجە: 18 پلەی سیلیزی

زاخۆ: 19 پلەی سیلیزی

سۆران: 18 پلەی سیلیزی

گەرمیان: 24 پلەی سیلیزی