لە بوومەلەرزەکەی پارێزگای ورمێ 528 کەس برینداربوون و 50 خانوو رووخاون

 

محەممەد سادق موعتەمدیان، پارێزگاری ورمێ رایگەیاند، 528 برینداری بوومەلەرزەی خۆی گەیێندراونەتە نەخۆشخانە کە 135یان خەوێندراون و ئەوانی دیکە دوای وەرگرتنی چارەسەر، نەخۆشخانەیان جێهێشتووە. 

 

موجتەبا قەمەری، بەڕێوەبەری فریاکەوتن لە زانکۆی پزیشکیی خۆی دەڵێت، 68 کەس بەهۆی شکانی ئەندامی جەستەیان وەک دەست، پێ و سەر لە نەخۆشخانە خەوێندراون.

 

پارێزگاری ورمێ هەروەها دەڵێت، بوومەلەرزەکە 12 گوندی سەر بە شاری خۆی گرتووەتەوە و 500 خانوو زیانیان پێگەیشتووە و 50 خانوو بە تەواوی رووخاون و 450 خانوو بەرێژەی 20 تاوەکو 50٪ زیانیان پێگەیشتووە.

 

بەپێی راپۆرتی ناوەندی تۆمارکردنی بوومەلەرزەی ئێران، بوومەلەرزەکە کاژێر 3:51 خولەکی بەرەبەیانیی ئەمڕۆ چوارشەممە بەکاتی رۆژهەڵاتی کوردستان روویداوە و ناوەندی بوومەلەرزەکە حەوت کیلۆمەتر لە شاری خۆیەوە دوور بووە لە باکووری پارێزگای ورمێ. گوڕەکەی 5.4 پلەی رێختەر بووە. بەپێی راپۆرتی ئەو ناوەندە، لە کاژێر 4 تاوەکو 7ی بەیانی نزیکەی 20 بوومەلەرزەی بچووک و پاشلەرزە لەو ناوچەیە روویانداوە.