مەزڵووم عەبدی: ئومێدەوارین پرسی کورد لە سووریا چارەسەر بکرێت

 

 

رۆژی یەکشەممە 04-12-2022 مەزڵووم عەبدی، فەرماندەی گشتیی هەسەدە لە تویتێكدا نووسی، "پێشوازی لە هەڵوێستی نێودەوڵەتی لە ئەنجوومەنی ئاسایشی نێودەوڵەتی بۆ رەتکردنەوەی ئۆپەراسیۆنەکەی تورکیا دەکەین. شانازی بە هاوبەشیی نێودەوڵەتییەوە بۆ سەقامگیرکردنی باکووری رۆژهەڵاتی سووریا دەکەین."

 

مەزڵووم عەبدی لە بەشێکی دیکەی تویتەکەدا دەڵێت، "ئومێدەوارین ئەو هەڵوێستانە لەسەر زەوی جێبەجێ بکرێن و ببنەهۆی کۆتاییهێنان بە هێرشەکانی سوپای تورکیا و دۆزینەوەی چارەسەری سیاسی بۆ قەیرانی سووریا و پرسی کورد."

 

رۆژی 20-11-2022 تورکیا دەستی بە بۆردوومانکردن و تۆپبارانکردنی رۆژئاوای کوردستان و ناوچەکانی دیکەی ژێر دەسەڵاتی هەسەدە کرد و دواتر هەڕەشەی هێرشی زەوینیی کرد، بەڵام زۆرینەی وڵاتانی کاریگەری کۆمەڵگەی نێودەوڵەتی ئەو هەڕەشانە رەتدەکەنەوە و داوا لە تورکیا دەکەن ئۆپەراسیۆنە سەربازییەکەی ئەنجام نەدات.