ئاگری شەڕی تورکیا و پەکەکە لە گوندەکانی بناری چیای مەتین نزیکبووەتەوە

 

محەممەد سەرگەلی، ئاژەڵدار بە رووداوی گوت، "پێش 10-15 رۆژ بەردەوام دەڤەری سگێرێ بۆردوومان دەکرا، ئێستا نێوان گوندەکەی ئێمە و [گوندی] بەلاڤە بۆردوومان دەکرێت و تاوەکو ئێستا ئاگرەکە نەکوژاوەتەوە. هەتا ئاگری شوێنێک دەکوژێتەوە، شوێنێکی دیکە ئاگر دەگرێتەوە. بەرامبەر باخەکەمانیش ئاگری گرتووە."

 

ئاگری شەڕی تورکیا و پەکەکە نزیکبووەتەوە لە گوندەکان، بە تایبەت ئەو گوندانەی دەکەونە بناری چیای مەتین، بەوهۆیەوە بەشێک لە دانیشتووانی گوندەکان ناچارن ماڵ و حاڵی خۆیان چۆڵ بکەن. ئاژەڵدارێکی خەڵکی گوندی گوهەرزێ لە بناری چیای مەتین دەڵێت، بەهۆی بۆردوومانی تورکیاوە، بەشێک لە ئاژەڵەکانی هەرزانفرۆش کردووە و هەندێک لە ئاژەڵەکانیشی گواستووەتەوە.

 

ئەحمەد سەعدوڵڵا، موختاری گوندی گوھەرزە و ئاژەڵداریشە، دەڵێت، "20 مەتر لە نزیک شوێنی مانەوەی ئاژەڵەکان بەر بۆردوومان کەوتووە، هەروەها شەوان پەکەکە تەقە دەکات و فڕۆکەش بۆردوومان دەکات."

 

لەماوەی چەند رۆژی رابردوودا بەهۆی بەردەوامیی بۆردوومان و تۆپبارانەکانی تورکیا، هێڵی کارەبای ناحیەی کانی ماسێ و 15 گوندی سنوورەکە بڕا، بەڵام هەرزوو لە لایەن تیمەکانی بەڕێوەبەرایەتیی کارەبای ئامێدی چارەسەر کران.

 

ئارام جەلال، بەڕێوەبەری دابەشکردنی کارەبای قەزای ئامێدی باسی لەوە کرد، "[پچڕانی کارەبای گوندەکان] کێشەیەکی رۆژانەی ئێمەیە. ئاماری مانگی هەشت بۆتان باس دەکەم، تەنیا لە 27،06،02،01-08، هەروەها 04-09ی ئەم مانگەش، هێڵی کارەبای 11 کەی ڤی بەهۆی شەڕەوە پچڕا، جا بەهۆی تەقەیە یان بۆردوومان ئێمە ئەوە نازانین."

 

سێ ساڵە تورکیا هەرجارەو ناوچەیەکی سنووری پارێزگای دهۆک و ئیدارەی سەربەخۆی زاخۆ دەکات ئامانج. ساڵی 2020 ناوچەی حەفتانین لە زاخۆ، ساڵی رابردوو ناوچەی کێستە لە دەڤەری کانی ماسێ و ئەمساڵیش دەڤەری زاپ و ئاڤاشین لە سنووری ناحیەی شیلادزێ، هەروەها ئەم چەند رۆژەش چیای گارە کەوتووەتە ژێر مەترسیی ئەو ئامانجە.