مونا قاوەچی: دوای خانەنشینبوونم هیچ پارەیەکم وەرنەگرتووە

 

 

سێشەممە 04-07-2023 مونا قاوەچی، سکرتێری خولی پێنجەمی پەرلەمانی کوردستان بە رووداوی راگەیاند، "دوای هەڵوەشانەوەی ئەم خولەی پەرلەمانی کوردستان و خانەنشینبوونم، هیچ پارەیەکم وەرنەگرتووە، بەو پێیەی من لە خولی چوارەمیش پەرلەمانتار بووم، هەر بە پایەی پەرلەمانتاری خانەنشین بووم."

 

مونا قاوەچی گوتیشی، "لە هەندێک راگەیاندنی فەرمی و نافەرمی، بڵاوکراوەتەوە گوایە من چەندین ملیۆن دیناری نەسریەی پەرلەمانم بۆ خۆم وەرگرتووە، بەڵام ئەوە دوورە لە راستی و تەنانەت ناشزانم مەبەستیان چییە لە نەسریە."

 

یەکشەممە 2ی تەممووزی 2023 کاری خولی پێنجەمی پەرلەمانی کوردستان بە فەرمی کۆتاییهات و نووسراو بۆ هەموو ئەو پەرلەمانتارانە کرا کە بەگوێرەی یاسا خانەنشین دەبن.

 

مونا قاوەچی ئاماژە بەوە دەکات، "هەر پارەیەک لەلایەن من وەکو سکرتێری پەرلەمان خەرجکرابێت، جا بۆ کاروبارەکانی پەرلەمان بووبێت یان هاوکاریی خەڵکی هەژار، وەسڵی هەموویانم بە بەڵگەی سەلمێنەرەوە داوەتە پەرلەمان."