زبڵ و خاشاکی کەڵەکەبووی نێو شاری کەرکووک بە زیاتر لە هەزار تۆن دەخەمڵێندرێت

 

ئەحمەد عەبد، کرێکار بە تۆڕی میدیایی رووداوی راگەیاند، "ئێمە پاشماوەکان جیادەکەینەوە، کارتۆن بە جیا و پلاستیک و قوتووەکان بە جیا، دواتر بژێویی ژیانی پێ پەیدا دەکەین. خەڵکانێک هەیە دێن و زبڵخانەکە دەسووتێنن، بەڵام ئێمە تا پێمان بکرێت دەیخەینە ژێر زەوی و لەنێو ئەو دۆڵە ونی دەکەین."

 

خۆڵ و خاشاک زۆربەی گەڕەکەکانی کەرکووکی تەنیوە، پێشتر کۆمپانیایەکی کەرتی تایبەت ئەرکی خاوێنکردنەوەی شارەکەی لە ئەستۆ بوو، بەڵام پارەیەکی زۆری کەوتە لای ئیدارەی کەرکووک و ناچاربوو دەست لە کارکردن هەڵبگرێت.

 

خالید شینکی، خاوەنی کۆمپانیای خاوێنکردنەوە دەڵێت، "لە ساڵەکانی 2016-2017 تاوەکو ئەمڕۆ 15 ملیار دینارمان لەلای حکومەتی عێراقە کە پارێزگاری کەرکووک بەرپرسە لەو پارەیە و هیچمان بۆ ناکات و هیچمان وەرنەگرتووە، دەیان نووسراومان بۆ بەغدا کردووە و سوودی نەبووە."

 

پێنج ساڵە هەوڵدەدرێت چەمی خاسە لە کەرکووک بکرێتە ناوچەیەکی گەشتیاری، بەڵام ئێستا بووەتە شوێنی کەڵەکەبوونی خۆڵ و خاشاک و پاشماوە و ئاوەڕۆی شارەکە.

 

بوجەی خاوێنکردنەوەی یەک ساڵی کەرکووک 200 ملیۆن دینارە، ئەمەش وایکردووە 70٪ـی کارمەندانی شارەوانی کارنەکەن و خۆڵ و خاشاکی رۆژانەش هەر کەڵەکە ببێت. 

 

فەرەیدوون زەنگەنە، سەرۆکی شارەوانیی کەرکووک بە رووداوی گوت، "پارەی ئێمە هێندە کەمە نە کەس گرێبەستی پێدەکات و نە کارکردن، لەگەڵ ئەوەشدا ئەو پارەیە جێگر نییە، مانگ هەیە ناینێرن و جاری واش هەیە هەر دەبڕدێت، بۆیە ئێمە ناتوانین بەو پارەیە لە سەدا یەکی شار پاکبکەینەوە."

 

ئەو خۆڵ و خاشاکەی لەنێو گەڕەکانی کەرکووک کەڵەکە بووە، بە هەزار و 500 تۆن دەخەمڵێندرێت، بەشێکیان لەسەر شەقام و کۆڵانەکان دەمێننەوە و بەشێکی دیکەشی دەسووتێندرێت و ئەمەش بۆن و ژینگەی شارەکەی پیسکردووە.