بنکەیەکی هاوپەیمانان لە ناوچەکانی ژێر دەسەڵاتی هەسەدە کرایە ئامانج
رووداو دیجیتاڵ
بنکەیەکی هێزەکانی هاوپەیمانیی نێودەوڵەتی لە ناوچەکانی ژێر دەسەڵاتی هەسەدە بە مووشەک کرایە ئامانج. گوتەبێژی فەرماندەیی ناوەندی سوپای ئەمریکا دەڵێت، ئەو جۆرە هێرشانە ژیانی هاووڵاتییانی سڤیل و ئەندامانی هێزەکانی هاوپەیمانیی نێودەوڵەتی دەخاتە مەترسییەوە.
رۆژی چوارشەممە 4-1-2023، فەرماندەیی ناوەندی سوپای ئەمریکا تویتێكی بڵاوکردەوە و تێیدا هاتووە، ئەمڕۆ لە دەوروبەری کاژێر 09:00 بە کاتی سووریا، دوو مووشەک ئاراستەی بنکەیەکی هێزەکانی هاوپەیمانیی نێودەوڵەتی لە "باکووری رۆژهەڵاتی سووریا کران."
لە تویتەکەدا هاتووە، هێرشەکە هیچ زیانێکی گیانی نەبووە و زیانیشی بە بنکە سەربازییەکە نەگەیاندووە.
وەک لە تویتەکەدا هاتووە، هێزەکانی سووریای دیموکرات سەردانی ناوچەکەیان کردووە و مووشەکێکیشیان دۆزیوەتەوە کە نەتەقیبوو.
جەو بوسینۆ، گوتەبێژی فەرماندەیی ناوەندی سوپای ئەمریکا لەو بارەوە گوتی: "هێرشی لەم جۆرە هێزەکانی هاوپەیمانان و هاووڵاتییانیش دەخاتە مەترسیەوە و کاریگەری دەبێت لەسەر ئەو سەقامگیری و ئاسایشەی زۆر بە زەحمەت لە سووریا و ناوچەکە بەدەستهاتووە."