لە سلێمانی دابەشکردنی مووچەی خانەنشینی سەربازیی راگیرا

 

 

بەگوێرەی زانیارییەکانی تۆڕی میدیایی رووداو، ئەمڕۆ دووشەممە 03-04-2023، دابەشکردنی مووچەی مانگی شووباتی خانەنشینی سەربازی لە هەردوو بنکەی دابەشکردنی مووچە لە سیتی سەنتەر و ئازادی لە سلێمانی راگیراوە و بە خانەنشینان گوتراوە "پارە بەردەست نییە."

 

بەگوێرەی ئەوەی مووچە کراوە بە کۆد و هەر رۆژە و چەند خانەنشینێک وەریدەگرن، ئەمڕۆ نۆرەی بەشێکی خانەنشینانی سەربازی بووە کە زۆرینەیان خانەنشینی گوڵانن، بەڵام بەهۆی نەمانی پارەوە نیوەیان مووچەیان وەرنەگرتووە و دەگوترێت ئەگەر هەیە پارە بنێردرێت و خانەنشینان چاوەڕوانی هاتنی پارەن.

 

رۆژی 8ی ئادار وەزارەتی دارایی و ئابووری دابەشکردنی مووچەی مانگی شووباتی دەستپێکرد و بڕیاربوو دوایین شوێن سێ سەرۆکایەتییەکەی هەرێمی کوردستان و خانەنشینیی پێشمەرگە لە 30ی ئاداردا مووچەکانیان وەربگرن.

 

مانگی رابردوو رۆژی 6ی شووباتی 2023 دەست بە دابەشکردنی مووچەی مانگی کانوونی دووەمی 2023 کرا.

 

لە هەرێمی کوردستان یەک ملیۆن و 251 هەزار و 451 مووچەخۆر هەن، 751 هەزار و 805 کەسیان فەرمانبەری سەربازی و شارستانین؛ 242 هەزار و 269 کەسیشیان خانەنشینن.