هەسەدە هەموو هاوئاهەنگییەکی بەرەنگاربوونەوەی تیرۆر لەگەڵ هاوپەیمانان رادەگرێت

 

رۆژی هەینی 2ـی کانوونی یەکەمی 2022، ئارام حەنا، گوتەبێژێکی هەسەدە بە ئاژانسی رۆیتەرزی گوت: "هەموو هاوئاهەنگییەک و ئۆپەراسیۆنی هاوبەشی بەرەنگاربوونەوەی تیرۆر لەگەڵ هاوپەیمانان و هەموو ئۆپەراسیۆنە هاوبەشە تایبەتییەکانیش کە ناوبەناو دەمانکردن، راگیراون." 

 

ئەوە لەکاتێکدایە کە رۆژی 30ـی تشرینی دووەم، پاتریک رایدەر، گوتەبێژی پێنتاگۆن رایگەیاند کە ئۆپەراسیۆنەکانی دژی داعش نەوەستاون. رایدەر گوتی: "ئێستا شەڕی دژی داعش بەردەوامە، بەڵام گەڕانی هاوبەشمان کەمکردووەتەوە. بەردەوامبوونی ناکۆکییەکان بەتایبەتی هێرشی زەوینی، ئەو دەستکەوتانەی بەزەحمەت لە دژی داعش بەدەستهێندراون، دەخاتە مەترسییەوە و ناسەقامگیرییش لە ناوچەکە دروست دەکات."

 

پێشتریش رۆژی 29ـی تشرینی دووەم، مەزڵووم عەبدی، فەرماندەی گشتیی هەسەدە داوای هەڵوێستێکی "تووندتری" لە ئەمریکا کرد سەبارەت بە هێرشەکانی تورکیا بۆ سەر رۆژئاوای کوردستان و گوتی: "ئێمە پێویستیمان بە راگەیێندراوی بەهێزتر و کۆنکرێتیی هەیە بۆ ئەوەی تورکیا بوەستێنن." 

 

شەوی 19 لەسەر 20ـی تشرینی دووەم، یەکەم فڕۆکەی سوپای تورکیا لە ئامەدی باکووری کوردستانەوە بۆ بۆردوومانکردنی چەند پێگەیەک لە چوارچێوەی ئۆپەراسیۆنی "چنگ - شمشێر" فڕی. وەزارەتی بەرگریی تورکیا گوتی، ژمارەیەک پێگەی هەسەدەیان لە رۆژئاوای کوردستان و ناوچەکانی دیکەی ژێر دەسەڵاتی بەڕێوەبەرایەتیی خۆسەر بۆردوومانکردووە.  

 

مەزڵووم عەبدی، فەرماندەی گشتیی هێزەکانی هەسەدە رۆژی 26-11-2022 رایگەیاند: "لەبەر ئەوەی ئەو هێزانەی کە لە دژی داعش شەڕ دەکەن، خۆیان بوونەتە ئامانجی ئەم هێرشانە، هەروەکو بینیتان، هێرشکرایە سەر کامپی هۆل و گرتووخانەکان. ئەوەش وایکرد تێکۆشینەکانمان بەناچاری بوەستێنین." 

 

لە ساڵی 2016ـەوە بە هاوکاریی هێزە نزیکەکانی، تورکیا سێ ئۆپەراسیۆنی لە ناوچەکانی ژێر دەسەڵاتی بەڕێوبەرایەتیی خۆسەر ئەنجامداوە؛ لە ئابی 2016دا تورکیا دەستی بەسەر جەرابلوس و ئەعزازدا گرت. سەرەتای ساڵی 2018 تورکیا و هێزە نزیکەکانی لە ئۆپەراسیۆنی ناولێنراو بە چڵە زەیتوون لە لایەن ئەنقەرەوە دەستیان بەسەر هەرێمی عەفرینی رۆژئاوای کورستاندا گرت. لە تشرینی یەکەمی 2019ش ئەو هێزانە هێرشیان کردە سەر سنووری سەرێکانی و گرێ سپی لە رۆژئاوای کوردستان و ئەوانیشیان داگیرکرد. 

 

ئێستاش سەرۆککۆماری تورکیا هەڕەشەی ئەنجامدانی ئۆپەراسیۆنی زەمینی بۆ سەر تل رەفعەت، منبج و کۆبانێ دەکات کە هەموویان لەژێر کۆنتڕۆڵی بەڕێوەبەرایەتیی خۆسەردان. تورکیا دەیەوێت بە درێژایی سنوورەکەی لەگەڵ سووریا، بە قووڵایی 30 کیلۆمەتر بچێتە پێشەوە.