شەڕی پەکەکە و تورکیا دانیشتووانی 38 گوندی ئاوارە کردووە
رووداو دیجیتاڵ
بەهۆی شەڕی تورکیا و پەکەکە لە سێ مانگی رابردوو 38 گوندی باشووری کوردستان چۆڵکراون و دەیان گوندی دیکەش مەترسیی چۆڵبوونیان لەسەرە. رووداو بۆچوونی ژمارەیەک لە دانیشتووانی گوندە سنوورییەکانی وەرگرتووە کە کاریگەریی بۆردوومان و شەڕی پەکەکە و تورکیا لەسەر ژیانی رۆژانەیان هەیە. دانیشتوویەکی گوندی کەشان دەڵێ؛ سێ مانگە گوندەکەیان جێهێشتووە؛ شەڕ نە باخ نە ماڵ و نە ئاژەڵی بۆ هێشتنەوە.
ئه‌میر نیسان، دانیشتووێکی گوندى شه‌رانش كریستیان دەڵێت، "ئەوە هەشت مانگە ئێمە بە یەکجاری گوندمان بەجێهێشتووە، ناهێڵن بچینە گوندەکەمان.. شتەکانمان هەمووی لەوێیە، دەرکردنەکەمان لە ناکاو بوو و تەقەیان لێکردن، بۆیە جێمانهێشت".
چیا عۆمه‌ر، هاونیشتمانییەکی گوندى بۆسه‌لە و دەڵێت، من ئاوارە بووم و هاتووم بۆ زاخۆ، ماوەی شەش حەوت مانگە فڕۆکەکانی تورکیا و پەکەکە رێگە نادەن بچینە گوندەکەمان، ترێکانمان وشک بوون، بژێویمان وشک بووە".
ره‌مه‌زان زیاب، هاونشتیمانییەکی گوندى كه‌شانە و دەڵێت، سێ مانگ پێش ئێستا گوندەکەیان لەبەر شەڕی تورکیا و پەکەکە جێهێشتووە، "نە بێستانەکانمان ماون، نە مەڕوماڵا، نە هیچ شتێک ماوە، هەموو شتەکان وشک بوون، ئەمە حەفتەیەکە گوتوویانە سێشەممە و هەینیان وەرن باخەکانتان ئاو بدەن، لە کاتی دیکە قەدەخەیە".
به‌هۆى ئۆپەراسیۆنی چڕنووکی برووسكه زیانێكى زۆر بەر جووتیارانى ئه‌و ناوچانە کەوتووە، شەڕ و ئاڵۆزى نێوانیان كاریگه‌ریی لەسه‌ر كشتوكاڵ و ئاژه‌ڵداران زیاتره.
ئه‌میر نیسان لەبارەی داواکارییان لە حکومەتی هەرێمی کوردستان و عێراق دەڵێت، "داوا لە حکومەتی عێراق و هەرێمی کوردستان ئەوەیە رێگەیەکمان بۆ بدۆزنەوە، ئەو کەلوپەل و ناوماڵەمان بۆ دابینبکەن، نەک لە سەرەتاوە جارێکی دیکە بیکڕین".
چیا عومه‌ر دەڵێت، "داوامان لە حکومەتی عێراق و هەرێمی کوردستان ئەوەیە پەکەکە لە گوندەکەمان دوور بخەنەوە، بە هەر شێوەیەک بێت ئەوانمان لێ دوور بکەنەوە، بە دوورخستنەوەی ئەوان، دەڤەرەکەمان زۆر خۆش دەبێت".
سه‌لاح عه‌بدولكه‌ریم، هاونشتیمانییەکی گوندی شیلانە و دەڵێت، "داوامان لە حکومەتی هەرێمی کوردستان و عێراق ئەوەیە کە قەرەبووی خەڵکە زیانپێگەیشتووەکان بکاتەوە، تەنانەت خانووە تێكچووەکانیش قەرەبوو بکرێنەوە".