ڤێتێرنەریی هەولێر: ئاژەڵ کەم دەشۆردرێت، بۆیە تای خوێنبەربوون زیاد بووە

 

د. مامەند محەممەد، بەڕێوەبەری ڤێتێرنەریی هەولێر بە رادیۆی رووداوی راگەیاند: "لەم ساڵانەی دواییدا لەبەر ئەوەی ئاژەڵ کەم دەشۆردرێت و دەرمان بە گەوڕ و تەویلەکاندا ناڕشێندرێت، ئەم نەخۆشییە لە عێراقدا زیاد بووە. هەروەها هێنانی ئاژەڵیش لە وڵاتانەوە هۆکارە بۆ ئەوەی نەخۆشییەکە بڵاوببێتەوە."

 

تای خوێنەبەربوون نەخۆشییەکی هاوبەشە لەنێوان مرۆڤ و ئاژەڵدا کە هۆکارەکەی ڤایرۆسێکە بە ناوی مایرۆ و لە رێگەی گەنەوە لە ئاژەڵی نەخۆشەوە بۆ ئاژەڵی ساخ دەگوازرێتەوە. مرۆڤیش لە رێگەی هەڵسوکەوتکردنەوە لەگەڵ گۆشتی ئاژەڵی تووشبوو بە ڤایرۆسەکە لە شوێنەی برینەکانەوە تووش دەبێت.

 

بەڕێوەبەری ڤێتێرنەریی هەولێر باس لەوە دەکات: "نەخۆشیی تای خوێنبەربوون لە عێراقدا رابردوویەکی کۆنی هەیە و لە ساڵی 1979ـەوە تۆمار کراوە. لەم ساڵانەی دواییشدا لە هەرێمی کوردستانیش تۆمار کراوە و خەڵکیشی کوشتووە."

 

هەندێک ئاژەڵی وەک کەروێشک، جرج و مشک و هەندێک ئاژەڵی خۆماڵی هەڵگری نەخۆشییەکەن.

 

بە گوتەی د. مامەند محەممەد، هەر کاتێک گەنە و ئەو مێرووانەی خوێنی ئاژەڵان دەمژن زۆر ببن، ئەم نەخۆشییە پەیدا دەبێتەوە. 

 

بەڕێوەبەری ڤێتێرنەریی هەولێر جەختی لەوە کردەوە، دەبێتە رێگە نەدرێت ئاژەڵ لە وڵاتانەوە بهێنرێنە هەرێمی کوردستان، یان ئەگەر هێنران دەبێت 21 رۆژ کەرەنتین بکرێن.