بۆ رێگری لە دوو گیانی، تەندروستیی کۆیە بێ بەرامبەر کۆندۆم دەدەنە هاوژینان

 

ئەمڕۆ یەكشەممە، 09-06-2024، بەڕێوەبەرایەتیی گشتیی تەندروستیی کۆیە رایگەیاند، (یەکەی رێکخستنی خێزان لە مەڵبەندی تەندروستی حاجی قادر) لە قەزاکە کراوەتەوە و لەلایەن بێری فەلاح، پزیشکی شارەزای ژنان و منداڵبوونەوە سەرپەرشتی دەکرێت.

 

بەگوێرەی راگەیێندراوەکە: "کاری سەرەکیی ئەم یەکەیە بریتییە لە پێدانی رێنوێنی و چارەسەر بۆ هاوژینان؛ دانانی پلان بۆ کاتی وەچەخستنەوە و ژمارەی منداڵ، ماوەی نێوان منداڵێک بۆ منداڵێکی دیکە و بە بەکارهێنانی هۆکارێکی دروست بۆ دواخستنی دووگیانی کە گونجاو بێت لەگەڵ باری تەندروستی، ئابووری و کۆمەڵایەتی لە چوارچێوەی بەرپرسیارێتی بەرامبەر بە خۆیان و منداڵەکانیان، بەشێکی کارەکانە".

 

هاوکار عەلی، گوتەبێژی تەندروستیی کۆیە بە رووداوی گوت: "هەموو کەرستەکانی پێویست بۆ رێگری لە دووگیانی بۆ سەنتەرەکە دابینکراوە، کە بۆ پیاوان کۆندۆم بێ بەرامبەرە و ژنانیش لوولبی منداڵان (رێگری سەر قۆڵ)یان بێبەرامبەر بۆ دابین دەکرێت".

 

گوتەبێژی تەندروستیی کۆیە گوتی، یەکەی رێکخستنی خێزان هەفتانە دوو رۆژ پێشوازی لە هاوژینان دەکات، ئەوانیش رۆژانی یەکشەممە و چوارشەممەیە.