نووسەرێکی کورد و دوو نووسەری بیانی کتێبێک لەبارەی شێوەزارەکانی زمانی کوردی بە ئینگلیزی بڵاودەکەنەوە

 

کتێبەکە ناوی "جیاوازییە بنچینەیی و جۆرییەکان لە دیالێکتە کوردییەکان"ە و لەلایەن نووسەران ئەرگین ئوپەنگین، یارۆن ماتراس و جیۆفری هەیگەوە نووسراوە. لە کتێبەکەدا باس لە زۆر بابەتی پەیوەندیدار بە فۆنۆلۆجی و مۆرفۆسینتاکس کراوە و ماتریاڵەکەی نێویشی لە زیاتر لە 120 شوێنی کوردستان لە باکووری کوردستان، رۆژئاوای کوردستان و باشووری کوردستان و رۆژهەڵاتی کوردستان کۆکراوەتەوە. 

 

رۆژی یەکشەممە 23-10-2022، ئەرگین ئوپەنگین، نووسەری کوردی کتێبەکە و مامۆستای زانکۆ لە بەریتانیا بە تۆڕی میدیایی رووداوی گوت: "لە کتێبەکەدا نۆ بابەتی درێژ هەن و باس لە شێوەزارەکانی زمانی کوردی دەکەن".

 

ئەرگین ئوپەنگین ئاماژەی بەوەش كرد، نێوەڕۆکی کتێبەکە باس لە هەموو شێوەزارەکانی کوردی لە چوار پارچەی کوردستان دەکات جگە لە زازاکی و هەورامی، گوتیشی، کۆمەڵێک وشە و رستە لە هەموو زاراوەکانی زمانی کوردی شیکردنەوەیان بۆ کراوە بۆ ئەوەی بزاندرێت شێوەزارەکان چەند لەیەکەوە نزیکن.

 

کتێبەکە ئێستا بەشێوەی ئۆنلاین بەردەستە و لە ژمارەیەک لە کتێبخانەکانی بەریتانیاش هەیە. 

 

ئەرگین ئوپەنگین مامۆستایە لە زانکۆی کامبریج لە بەریتانیا؛ یارۆن ماتراس مامۆستای زمانەوانییە لە زانکۆی مانێچستەر و جیۆفری هەیگ مامۆستای زمانەوانییە لە زانکۆی بامبێرگی ئەڵمانیایە.