رووداو دیجیتاڵ
ئەدێل هونەرمەندی بەریتانی، هەرچەند بۆ ماوەی دورودرێژ بێدەنگ دەبێت، بەڵام کە دەگەڕێتەوە نێو گۆڕەپانی هونەر، هەموو ژمارە پێوانییەکانی سەردەمی بێدەنگی خۆی دەشکێنێت، ئەمجارەش بە ئەلبوومە نوێیەکەی توانی ژمارەی پێوانەیی نوێ تۆمار بکات.
'MRC Data' دەزگای تایبەت بە بڵاوکردنەوەی داهاتی بەرهەمە میوزیکییەکان رایگەیاندووە، ئەلبوومی '30'ـی ئەدێل پڕفرۆشترین ئەلبوومی 2021 و لە ماوەی سێ رۆژدا 500 هەزار کۆپی فرۆشراوە، بەمەش توانی پێش ئەلبوومی 'evermore'ـی تایلۆر سویف بکەوێت کە پڕفرۆشترینی ئەمساڵ بوو.
لەلایەکی دیکەوە ئەدیڵ، لەرێگەی ڤیدیۆکلیپی'Easy On Me' ژمارەی پێوانەیی تۆمارکرد کە یەکێکە لە تراکەکانی نێو ئەلبوومە نوێیەکەی.
ئەم بەرهەمە تەنیا لە خزمەتگوزاری سپۆتیفای لە 24 کاژێردا، 19 ملیۆن جار بیستراوە، بەمەش یەکەم بەرهەمە لە ماوەیەکی کورت لەو خزمەتگوزارییە میوزیکییە ئەو ژمارەیە تۆماربکات.
'Easy On Me' لە کەناڵی تایبەتی ئەدێل لە یوتیوب لە ماوەی دوو رۆژدا 60 ملیۆن بینەری هەبوو و لە 23 ئەم مانگەش بەشێوەی لایڤ میوزیک بڵاویکردەوە.
دەرکەوتنی ئەمجارەی ئەدێل لە رووی شێوە و رووخسارییەوە تەواو جیاوازە، لە دوای ئەوەی لە ساڵی رابردووەوە بەشێوەیەکی بەرچاو کێشی دابەزاند.
ئەدێل ناوی تەواوی ئەدێل لۆری بلوو ئەدکینزە، لە 5ـێ ئایاری 1988 لە تۆتنهام لە لەندەن لە دایکبووە، جگە لە گۆرانیگوتن، تێکستی گۆرانیش دەنووسێت و یەکەم ئەلبوومی گۆرانیی لە 2008 بەناوی '19' بڵاوکردەوە و لەرێگەی دووەم ئەلبوومی بەناوی '21' ناوبانگی جیهانی پەیداکرد.
ئەلبوومی '21' بۆ ماوەی 18 هەفتە لە ریزبەندی یەکەمی لیستی ئەلبوومە پڕفرۆشەکانی بەریتانیادا بوو بەهۆیەوە ژمارەی پێوانەیی تۆمارکرد و لە کتێبی گینس تۆمارکرا.
ئەدێل گۆرانی بۆ یەکێک لە بەشەکانی زنجیرە فیلمی سینەمایی 'James Bond' گوتووە، ئەویش فیلمی 'Skyfall'ـە کە لە 2013 توانی خەڵاتی ئۆسکار وەک باشترین میوزیک بەدەستبێنێت.
ئەو خانمە گۆرانیبێژە خاوەنی چەندین نازناو و خەڵاتی جیهانییە، گرنگترینیان خەڵاتی گرامی و ئۆسکار.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ