بە دیزاینەکانی ئیڤ سان لۆران هەفتە نمایشی جلوبەرگی پاریس دەستیپێکرد

 

هەفتە نمایشەکە رۆژی سێشەممە 17ـی کانوونی دووەمی 2023 بە جلوبەرگی شیکی ئەو براندە جیهانییە دەستیپێکرد و نوێترین دیزاینەکانی بۆ پیاوان لە وەرزی زستان خستەڕوو.

 

چارلۆت گەینسبۆرگ، ئەکتەر و گۆرانیبێژی فەرەنسی لە نمایشەکە ئامادەبوو و چەند پارچە میوزیکێکی بە ئامێری پیانۆ ژەنی.

 

تەواوی دیزاینەکان بە رەنگی رەش ئامادەکرابوون و لە بەشێکیاندا کراسی سپی لەگەڵ پانتۆڵی رەشدا بەکارهاتبوون.

 

چالاکییەکانی هەفتە نمایشی جلوبەرگی پاریس تایبەت بە دیزانی جلوبەرگی پیاوان لە زستاندا، لە 17 ئەم مانگە دەستیپێکرد و تاوەکو 22 مانگ لە پاریسی فەرەنسا بەردەوام دەبێت، تێیدا بەناوبانگترین براند و دیزاینەرانی جیهان دیزاینەکانیان پێشکێش دەکەن.

 

ئیڤ سان لۆران، دیزاینەرێکی فەرەنسییە و لە 1ـی ئابی 1936 لە دایکبووە و لە 2008 کۆچی دواییکردووە، براندەکەی لە بواری فاشن بەناوی خۆی کردووە، لە تەمەنی 18 ساڵیدا لە پێشبڕکێیەکی دیزاینی جلوبەرگ براوە بووە، سێ ساڵ دوای ئەوە و لە دوای کۆچی دوایی خاوەنی براندی براندی دیۆر، وەک سەرۆکی خانەی دیۆر دەستنیشانکرا.