جۆنی دێپ روو لە کاری دەرهێنان دەکاتەوە

 

ئەم بەرهەمە سینەماییە بەناوی 'Modigliani'یە و لەبارەی ئامەدێیۆ مودێلیانی، هونەرمەندی ئیتاڵییە و تیشک دەخاتە سەر 48 کاژێر لە ژیانیدا کە لەو ماوەیدا تەواوی ژیانی دەگۆڕێت.

 

دێپ، لە دوای سەرکەوتنی لە دۆسییەی ناوزڕاندنی لەلایەن ئەمبێر هێرد، هاوژینی پێشووی، دووبارە گەڕاوەتەوە نێو دنیای هونەر و پێشنیازی و دەرفەتی کاری سینەمایی زیاتری بۆ رەخساوە.

 

ئەو ئەکتەرە کە وێنەش دەکێشێت، بەم دواییە کۆمەڵە تابلۆیەکی هونەری کە بە کۆمپیوتەر کێشاویەتی، بە بڕی سێ ملیۆن و 500 هەزار دۆلاری ئەمریکی فرۆشت.

 

ئەو کۆمەڵە کارە هونەرییە چوار وێنە لەخۆدەگرێت و بەناوی 'Friends and Heroes'یە واتە 'هاوڕێ و پاڵەوانەکان' و وێنەی ژمارەیەک ئەستێرەی هۆلیوود و میوزیکی رۆک لەخۆدەگرێت. 

 

لەلایەکی دیکەوە بڕیارە دێپ، لە فیلمێکی نوێدا بەناوی 'Jeanne du Barry' رۆڵبگێڕێت و لە دەرهێنانی مایوین، دەرهێنەری فەرەنسییە و لە جۆری بەرهەمە درامایی و مێژووییەکانە و بڕیارە بەم نزیکانە کاری وێنەگرتنی بۆ بکرێت.

 

لەم بەرهەمەدا دێپ، رۆڵی شا لویسی پازدەیەم دەگێڕێت کە 59 ساڵ فەرمانڕەوایی فەرەنسای کردووە و بۆ ئەم مەبەستە دێپ سەردانی پاریسی کرد.

 

جۆنی دێپ، لە 9-7-1963 لە ئەمریکا لە دایکبووە، ئەکتەر، بەرهەمهێنەر، نیگارکێش و میوزسیانە، یەکێک لە ناسراوترین ئەکتەرەکانی جیهانە، براوەی چەندین خەڵاتە، لەوانە خەڵاتی گۆڵدن گڵۆب و خەڵاتی سەندیکای ئەکتەرانی شاشە، هەروەها بۆ سێ خەڵاتی ئۆسکار و دوو خەڵاتی بافتا بەربژێرکراوە.

 

یەکەم دەرکەوتنی دێپ لە رێگەی فیلمی 'Elm Street' بوو لە 1984، دواتر لە زنجیرەی '21 Jump Street' رۆڵی گێراوە و لە 1987 تاوەکو 1990 بەردەوام بوو و هۆکاری بەناوبانگبوونی بوو.