بەهۆی ناونانی منداڵەکانی بە عەبسی و نامیق ژنێک داوای جیابوونەوە دەکات

 

 

 

لە تۆڕە کۆمەڵایەتییەکاندا وا بڵاوبووەتەوە خانمێکی ئوردنی داوای جیابوونەوەی لە هاوژینەکەی دەکات، دوای ئەوەی هاوسەرەکەی پێداگری کردووە منداڵە دووانەکەیان ناوبنێت "عەبسی و نامیق" .

 

ئەم رووداوە لە سۆشیاڵمیدیا کاردانەوەی زۆری بە تایبەت لە ئوردن بەدوای خۆیدا هێناوە، هەندێک رەخنە لە پیاوەکە دەگرن بەوەی نابێت پێداگری بکات و ژنەکەش مافی ئەوەی هەیە ناوی منداڵەکانی هەڵبژێرێت. بەشێکیش پێیانوایە ئەوە حەزی سەردەمی منداڵی پیاوەکەیە و مافی ئەوەی هەیە ئەو خەونەی بهێنێتە دی.

 

زنجیرە کارتۆنی "عەدنان و لینا" لە ساڵی 1978 لەلایەن دەرهێنەری ژاپۆنی هایاو میازاکی بەرهەمهاتووە، لە ساڵانی هەشتا و نەوەدەکان لە وڵاتانی رۆژهەڵاتی ناوەڕاست و لە کوردستانیش پەخشدەکرا و، بینەرێکی زۆری هەبوو، تا ئێستاش بەردەوامە لە پەخشکردن.

 

زنجیرە کارتۆنەکە ناوی Future Boy Conan ـە و جگە لە عەدنان (Conan) و لینا (Lana) دوو کارەکتەری سەرەکی دیکەی هەیە بەناوەکانی عەبسی (Jimsy) و کاپتن نامیق (Dyce).

 

عەبسی کوڕێکی رەسەنە و لەو دوورگەیە بەتەنیا دەژی کە عەدنان بۆی دەچێت. دوورە لە هەموو پێشکەوتنەکانی ژیان. عەبسی دەبێتە یەکەم هاوڕێی عەدنان و لە رزگارکردنی لینا یارمەتی دەدات. عەبسی راوچییەکی باش بووە و زۆرجار خواردنی زۆر کێشەی بۆ دروستدەکات. زۆربەی کاتەکانی لەگەڵ عەدنان بەسەر دەبات. سەرەتا تێڕوانینێکی باشی بۆ ژنان نییە بەڵام لەکۆتاییدا ئەو تێڕوانینەی دەگۆڕێت.

 

کاپتن نامیق هاووڵاتییەکی دانیشتووی ئیندەستریا و کاپتنی کەشتی باراکاودەیە. فەرمانی پێ کرابوو کە بکەوێتە شوێن دکتۆر بریاک لاو، باپیری لینا و کچەکە بگەڕێنێتەوە ئیندەستریا، بەڵام لە کۆتاییدا دەبێتە یەکێک لە هاوپەیمانەکانی عەدنان و یارمەتی دەدات بۆ رووخاندنی رژێمی ئیندەستریا.

 

 

بەهۆی جەنگی جیهانی سێیەمەوە مرۆڤەکان ھەوڵی ھەڵاتن دەدەن، تەنیا یەک کەشتییەک توانی رزگاری بێت و لە دوورگەیەک بگیرسێتەوە. پاڵەوانی زنجیرەکە (Conan) یان (عەدنان)ـە. رۆژێک عەدنان لە راوە ماسی دا کچێک دەبینێت بەناوی lana یان لینا و لێرەوە ژیانی بەتەواوی دەگۆڕێت. 

 

لەلایەن سەردەستەی داگیرکەری ئەو سەردەمەوە بە دوای لینادا دەگەڕێن و بەبێ ئاگاداری عەدنان لینا دەڕفێنن و باپیری عەدنان ( کەسێکی بەساڵاچووە کە لە دوورگەکە عەدنان دەیبینێت و بە باپیرە بانگی دەکات) لەناو دەبەن.

 

عەدنانیش بۆ ئەو بەڵێنەی بە لینای دابوو بڕیار دەدات بچێت بەدوایدا بگەڕێت. لە رێگا لەگەڵ کوڕێک بەناوی عەبسی ئاشنا دەبێت و دەبێتە هاوڕێی. پێکەوە لە ھەوڵی دۆزینەوەی لینادا دەبن تا دەگەنە شوێنی بەندکردنی لینا و سەدان زیندانیی دیکە.

 

پاش ململانێیەکی زۆر و بە ھاوکاریی کاپتنێکی دەریاوان بەناوی نامیق، لینا رزگار دەکەن و سەرجەم دانیشتووانی قەڵاکە دەچنە دوورگەیەک بە ناوی دوورگەی (ھیوا) و ژیانێکی ئاسایی دەستپێدەکەن.