فیلمێکی نوێی جۆرج کلۆنی بڵاو کرایەوە
رووداو- هەولێر
جۆرج کلۆنی، ئەکتەری بەنێوبانگی هۆڵیوود بە فیلمێکی نوێ بە بینەران شاد دەبێتەوە، کە بەهاوبەشی لەگەڵ جۆلیا رۆبێرتس، پاڵەوانی فیلمەکە بەرجەستەی دەکەن.
فیلمی "Money Monster" لە نواندنی جۆرج کلۆنی و جولیا رۆبێرتس، ترێلەرەکەی بڵاوکرایەوە، کە تێدا جۆرج کلۆنی رۆڵی پێشکەشکاری بەرنامەیەکی تەلەڤزیۆنی دەبینێت و جۆلیاش وەک بەرهەمهێنەری ئەم بەرنامەیە دیاریکراوە.
رووداوەکانی ئەم فیلمە كاتێك دەستپێدەكەن، کە جۆرج کلۆنی راستەوخۆ بەرنامەیەک لەسەر ئابووری و دارایی پێشکەش دەکات، بەڵام لەنێو بەرنامەکەدا چەکدارێک دەردەکەوێت و هەموو ئامادەبووانی بەرنامەکە بە جۆرج کلۆنییەوە دەستبەسەر دەکات، هەڕەشەی کوشتنیش لە هەموویان دەکات.
ئەم چەکدارە بەهۆی ئەوەی سەروەت و سامانی بنەماڵەی لەدەستداوە، دەیەوێت لەڕێگەی ئەم بەرنامەوە پشکەکانی لە بۆرسەی وۆل ستریت بەرزبکاتەوە، تاوەکو سامانەکەی بۆ بگەڕێتەوە، بۆیە جۆرج کلۆنی و بەشێک لە میوانانی بەرنامەکە بۆمبڕێژ دەکات، بەڵام دواتر پۆلیس چەکدارەکە دەستگیر دەكات و ئەوان رزگار دەکات.