هاوخەمی هونەرمەندانی هۆلیوود بۆ قوربانییانی بوومەلەرزە

 

هیو جاکمان، ئەکتەری ئوسترالی، پۆستێکی بڵاوکردووەتەوە، تێیدا دەڵێت، دڵی بۆ هەموو ئەوانە دەسووتێت کە بەهۆی بوومەلەرزە وێرانکەرەکەی سوریا و تورکیا زیانیان بەرکەوتووە. 

 

هەروەها لینکی پەیوەندیکردن بە رێکخراوی یونسێفی داناوە بۆ ئەوانەی دەیانەوێت هاوکاری پێشکێش بکەن.

 

هەروەها دێمی لۆڤاتۆ، گۆرانیبێژ و ئەکتەری ئەمریکی لینکی یارمەتیدان بۆ قوربانییان و لێقەوماوان لە هەژمارە تایبەتەکانی لە تۆڕە کۆمەڵایەتییەکان داناوە.

 

لەلایەکی دیکەوە، ئەکتەری خاوەن خەڵاتی ئۆسکار راسل کرۆ، لە هەژماری فەرمی خۆی لە تویتەر بڵاویکردەوە: "ئاهـ تورکیا. دڵم. هەواڵی وێرانکەرە".

 

جێنیفر گارنەر، خانمە ئەکتەری ئەمریکی بانگەشەی بۆ کەمپینی 'سندوقی فریاگوزاری منداڵان' کردووە.

 

6ـی شوباتی 2023 بوومەلەرزەیەکی بەهێز باکوور و رۆژئاوای کوردستان، هەروەها تورکیا و سووریای هەژاند، لە ئەنجامدا زیاتر لە 23 هەزار کەس گیانیان لەدەستداوە و دەیان هەزاریش برینداربوون، هاوکات دەیان هەزار خێزان بێ ماڵ بوون پێویستییان بە هاوکاریی بەپەلەی مرۆیی هەیە.