لە هەولێر کۆنسێرتێکی میوزیک و گۆرانی بەڕێوەچوو

 

کۆنسێرتەکە ئێوارەی شەممە 8ـی حوزەیرانی 2024 لەلایەن پەیمانگەی گۆتەی ئەڵمانی لە عێراق، بە هاوبەشی فێرگەی فرێمینگ بۆ وێنەی رۆژنامەوانی و گەلەری سێڤ، لە چوارچێوەی پڕۆژەی"هێلان" پێشکێشکرا.

 

لە کۆنسێرتەکەدا بایەخ تاڵیب، گۆرانیبێژ و ژەنیاری ساز، ژیار ئەسعەد بە ئامێری ڤایۆلین، راستی محەممەد بە ئامێری ئۆرگ، محەممەد عەبدوڵڵا بە ئامیری گیتار و ئیبراهیم هێمن بە ئامێری ریتم بەشداربوون.

 

بایەخ تاڵیب، بە رووداوی راگەیاند، ئەو دڵخۆشە بە بەشداربوونی لە پڕۆژەی "هێلان" و هیوای خواست بەردەوام بن لە پاڵپشتیکردنی بەهرەمەندان.

 

پڕۆژەی "هێلان" ماوەی سێ ساڵە بەردەوامە، تێیدا کۆنسێرت، پێشانگەی فۆتۆگرافی و شێوەکاری و چالاکی دیکەی هونەری و کولتووری لەخۆدەگرێت، زیاتر گرنگی بە هونەرمەندان و بەهرەمەندانی گەنج دەدات.