بەهۆی ئاگرەوە ئەستێرەکانی هۆلیوود ماڵەکانیان جێدەهێڵن

 

ماندی مۆڕ، گۆرانیبێژ و ئەکتەری ئەمریکی، مارک هێمل، ئەکتەری ئەمریکی و جەیمس وۆدس، ئەکتەری ئەمریکی لەو ئەستێرانەن کە بەهۆی ئاگرکەوتنەوەی دارستانەکان لە گەڕەکی پسفێک پاڵسێدس لە لۆس ئەنجلس، ماڵەکانیان جێهێشتووە.

 

ماندی مۆڕ، لە هەژماری تایبەتیی لە ئینستگرام نووسیویەتی، ماڵەکەیان چۆڵکراوە و ئەو لەگەڵ منداڵ، سەگ و پشیلەکانی سەلامەتن. 

 

مارک هێمل، دەڵێت، لە 1993ـەوە، "ترسناکترین" ئاگرکەوتنەوەیە روویدابێت.

 

تیمی ئاگرکوژێنەوە زیاتر لە 24 کاژێرە سەرقاڵی کۆنترۆلكردنی ئاگرەکەن، بەڵام هێشتا پێیان کۆنترۆل نەکراوە. بەهۆی ئاگرەکەوە دوو کەس گیانیان لەدەستداوە و چەند کەسێکیش بریندارن، یەکێک لە بریندارەکان کارمەندی ئاگرکوژێنەوەیە. 

 

بەرپرسانی لۆس ئەنجلس دەڵێن، کارەبای زیاتر لە 210 هەزار ماڵ و باڵەخانەی بازرگانی پچڕاوە و زیاتر لە هەزار خانوو و باڵەخانەش بە تەواوەتی سووتاون. 

 

ئادەم ساندلەر، تۆم هانکس، بێن ئافلێک و ستیڤن سپێلبێرگ لە ئەستێرە دیارەکانی دیکەی هۆلیوودن کە ماڵەکانیان لەو ناوچەیەن.

 

هەر بەهۆی رووداوی ئاگرکەوتنەوەکە، ستۆدیۆکانی بەرهەمهێنانی فیلم، یەکەم پێشاندانی دوو فیلمیان لە سینەماکاندا هەڵوەشاندەوە.