بە بڵاوکردنەوەی پۆستەرێک ئامادەکاری بۆ نمایشکردنی 'دوا رۆژەکانی بابلۆ' لە هەولێر دەکرێت

 

سۆران عوسمان، پرۆدیۆسەری شانۆگەرییەکە، بە رووداوی راگەیاند، کاژێر 6:00ـی ئیوارەی چوارشەممە 15-6-2022 و رۆژانی دواتر، لە هۆڵی میدیا لە هەولێر نمایشدەکرێت و بینینی ئەم بەرهەمە بە بلیت دەبێت.

 

ئاماژەی بۆ ئەوەشکرد، نمایشکردنی شانۆگەرییەکە لە دوای 55 رۆژ نمایشکردنی لە شاری سلێمانی دێت و لەو ماوەیدا 26 هەزار و 400 بینەری هەبوو، ئەمەش دەستکەوتێکی گەورە بوو بۆ شانۆی کوردی، لە کاتێکدا باس لە قەیرانی بەرهەمی شانۆیی و بینەری شانۆیی دەکرێت.

 

روونیشیکردەوە، لە دوای نمایشکردنی شانۆگەرییەکە لە هەولێر، لە ماوەی داهاتوودا لە کەرکووک و دهۆکیش نمایش دەکرێت، بۆ دەرەوەی وڵاتیش پلانیان هەیە لە ئەڵمانیا نمایشی بکەن.

 

'دوا رۆژەکانی بابلۆ' بەرهەمێکی شانۆیی کۆمێدی و میوزیک ئامێزە، لە دەرهێنانی شوان کەریمە، سۆران عوسمان و کۆمپانیای سۆ مارکێتینگ بەرهەمهێنەرینە و لاوک ئەبوبەکر وەک یاریدەدەری دەرهێنەر کاری بۆ دەکات.

 

لەم بەرهەمە شانۆییەدا رێشان حەمۆ، رووبار خالید، سۆران ئەکرەم، تاهیر عەبدولواحید و هەنار کامەران و ژمارەیەک ئەکتەری دیکە رۆڵی تێدا دگێڕن.

 

'دوا رۆژەکانی بابلۆ' باس لە چیرۆکی بابلۆی دەوڵەمەند و بەناوبانگ دەکات، بەیانییەک بە سەردانێکی چاوەڕوان نەکراوی یەکێک لە کارمەندەکانی لە خەو هەڵدەستێ، ئەمەش دەستپێکی رۆژێکی دەبێت کە سەرتاپای ژیانی دەگۆڕێت، لە پاڵ چیرۆکی بابلۆ، چیرۆکی عاشقبوونی کچەکەی و شوفێرە تایبەتەکەی هەیە. 

  

شوان کەریم، لە 1991ـەوە لە بواری شانۆدا کاردەکات، لە 1994ـەوە لە ئەڵمانیا نیشتەجێیە و لە زانکۆی هانۆڤەر هونەری شانۆی خوێندووە، ئەندامی گرووپە شانۆییەکانی 'نامۆ'، 'هانۆڤەر 98، 'ئیمپرۆکۆکن' و 'سکێچ' بووە، لە زیاتر لە 50 بەرهەمی شانۆیی وەک ئەکتەر و دەرهێنەر بەشداربووە.

 

لە بەرهەمە شانۆییەکانی ئەو شانۆکارە کوردە وەک نووسەر و دەرهێنەر، 'کاتمان نەماوە بۆ گۆرانی'، 'شەوی نیشتمانی'، 'ساڵی سفر'، 'هەمیشە یەکێک جێمان دێڵێت'، 'گەر بڕیارە نمرین' و 'سەرەتا زۆر سەرەتا'، جگە لەم بەرهەمانەی کە بە کوردین، شەش بەرهەمی دیکەی شانۆیی بە زمانی ئەڵمانی هەیە و نووسەری رۆمانێکیشە.