نوێترین کۆمەڵە دیزاینی ئیلی سەعب لە میوزیکی رۆک ئاند رۆڵ سەرچاوەی گرتووە

 

دیزاینەکانی ئیلی سەعب جلی ئامادەکراو بوون و ئیلهامی لە میوزیکی رۆک ئاند رۆڵ وەرگیرابوو، بەتایبەتیش ئەستێرەی هەرە گەشاوەی ئەو ستایلی میوزیکە، ئالڤس پرەسلی.

 

هەفتە نمایشی جلوبەرگی پاریس، لە 26ـی شوباتی 2024 لە پاریسی فەرەنسا دەستیپێکرد و تاوەکو 5ـی ئازاری 2024 بەردەوام دەبێت.

 

هەفتە نمایشەکە ساڵانە بەپێی وەرزەکان سازدەکرێت، جگە لە جلوبەرگی ژنان، نمایشی تایبەت بە جلوبەرگی پیاوانیشی هەیە، هەف

تە نمایشی جلوبەرگی ئاسایی و گرانبەها لەخۆدەگرێت.

 

میلان، پاریس، لەندەن و نیۆیۆرک لە هەفتە نمایشی بەناوبانگەکانی جیهانن و ئەمساڵ هەفتە نمایشی جلوبەرگی دوبەیش دەستیپێکرد و دەیەوێت ناوی بخاتە لیستی هەفتە نمایشە بەناوبانگەکانەوە.

 

ئیلی سەعب، لە 1964 لە بەیروت لە دایکبووە، لە تەمەنی نۆ ساڵیدا بەهرەی لە بواری دیزایندا دەرکەوتووە و وێنەی جلوبەرگی بە وێنە کێشاوە و جلی بۆ خوشکەکەی دیزایین کردووە. 

 

 

لە تەمەنی 17 ساڵیدا لە بواری دیزاینی جلوبەرگدا لە پاریس خوێندوویەتی، دواتر گەڕاوەتەوە لوبنان و خانەیەکی تایبەتی کردووەتەوە و وەک دیزاینەرێک کاری کردووە.

 

لە 1997 یەکەم کۆلێکشنی تایبەت بە خۆی لە دەرەوەی لوبنان بڵاوکردەوە، ئەویش لە ئیتاڵیا بوو و یەکەم دیزاینەری عەرەب بوو بەرهەمەکانی لە هەفتەی نمایشی جلوبەرگی رۆما بخرێنەڕوو، لە 2002 هالی بێری، ئەکتەری ئەمریکی و براوەی خەڵاتی ئۆسکار وەک باشترین ئەکتەر، لە رێوڕەسمی دابەشکردنی خەڵاتەکانی ئۆسکار جلێکی لە دیزاینی ئەو دیزاینەرە پۆشی.