داهاتی بەشی دووەمی 'Dune' زیاتر لە 31 ملیۆن دۆلارە
رووداو دیجیتاڵ
بەشی دووەمی زنجیرە فیلمی "Dune" لە سینەماکانی جیهاندا پێشاندەدرێت، لەوانەش لە سینەماکانی کوردستان و داهاتی لە بەشێک لە سینەماکانی جیهاندا 31 ملیۆن و 523 هەزار دۆلارە، بەڵام تاوەکو ئێستا لە سینەماکانی ئەمریکا پێشان نەدراوە.
لەم بەرهەمەدا تیمۆسی چەلامێت، ئەکتەری ئەمریکی – فەرەنسی و زندێیا، ئەکتەری ئەمریکی رۆڵی سەرەکی دەگێڕن و لە دەرهێنانی دەنیز ڤیلۆنۆڤە، دەرهێنەری فەرەنسییە، مژاری سەرەکی ئەم بەشە تۆڵەسەندنەوەیە.
بەشی یەکەمی ئەم بەرهەمە سینەماییە لە 2021 بڵاوکرایەوە و پێشوازییەکی بەرچاوی لێکرا، داهاتی لە سینەماکانی جیهاندا 433 ملیۆن دۆلار بوو و توانی شەش خەڵاتی ئۆسکار بەدەست بێنێت.
بڕیاربوو بەشی دووەمی فیلمەکە لە 2023 بڵاوبکرێتەوە، بەڵام بەهۆی مانگرتنی ئەکتەر و نووسەرانی لە هۆلیوود، کاریگەری خستە سەر بەڕێوەچوونی کارەکانی و بەهۆیەوە بۆ 2024 دواخرا.
فیلمەکە بە تەکنیکی ئایماکس وێنەگیراوە و بودجەی بەرهەمهێنانی 190 ملیۆن دۆلارە، بەپێی هەڵسەنگاندنی بینەران بۆ فیلمەکە لە ماڵپەڕی ئای ئێم دی بی، توانی لە کۆی 10 خاڵ، نۆ خاڵ بەدەستبێنێت.