پشکى پەرەپێدانى پارێزگاکانى هەرێمى کوردستان لە خشتەى بودجە دانەنراوە

 

کۆردۆ عومەر، جێگرى سەرۆکى لیژنەى هەرێم و پارێزگاکانى پەرلەمانى عێراق ئەمڕۆ (پێنجشەممە) بە تۆڕى میدیایی رووداوى گوت "ئەو پشکە، دیار نییە و نازانرێت لەکوێدا جێگەى کراوەتەوە."

 

زیاتر لە دوو تریلیۆن دینار بۆ خەرجیی سەرمایەى پشکى هەرێمى کوردستان لە خشتەى بودجەى 2024 زیاد کراوە. زۆربەى ئەو پارەیە بۆ خەرجیی کۆمپانیاکانى نەوت دیاریکراوە.

 

جەمال کۆچەر، ئەندامى لیژنەى دارایی پەرلەمانى عێراق بە تۆڕى میدیایی رووداوى گوت "هیچ خشتەیەک بەردەست نییە کە پشکى هەرێمى کوردستانى لەو بودجەیە دیاریکردبێت."  

 

26ى ئایار وەزارەتى پلاندانانى عێراق روونکردنەوەیەکى لەبارەى خشتەى بودجە بڵاوکردەوە، تێیدا ئاماژەى بەوەدابوو بودجەی پەرەپێدانى پارێزگاکان گەیشتووەتە زیاتر لە سێ تریلیۆن دینار. 

 

جەمال کۆچەر دەڵێت "دەبێت 12.67%ـی ئەو بڕە پارەیە وەک پشکى بودجەى پەرەپێدانى پارێزگاکانی هەرێمی کوردستان دیاری بکرێت." 

 

بەوپێوەرە بێت، بودجەکە دەکاتە نزیکەى 380 ملیار دینار، بەڵام ساڵى رابردوو 12.67%ـی تێکڕاى بودجەی پەرەپێدان بۆ هەرێمى کوردستان دیاری نەکرا، کە دەبوو 315 ملیار دینار بێت، لەبرى ئەوە 276 ملیار و 500 ملیۆن دینار لە خشتەى پشکى هەرێمى کوردستان دانرابوو، بەڵام بە گوتەى جێگرى سەرۆکى لیژنەى هەرێم و پارێزگاکان "هیچ بڕەپارەیەکى لێ نەنێردراوە."

 

بودجەى پەرەپێدانى پارێزگاکان بە گوێرەى یاسای بودجە لەسەر بنەماى ژمارەى دانیشتووان و رێژەى هەژاری بەسەر پارێزگەکاندا دابەش دەکرێت.

 

کوردۆ عومەر رایگەیاند "دوو نووسراوى حکومەتى هەرێمى کوردستان و لیژنەى هەرێم و پارێزگەکانى پەرلەمان ئاراستەى وەزارەتى پلاندانانى عێراق کراون بۆ چارەسەرى کێشەى خەرجنەکردنى ئەو پارەیە." 

 

نووسراوەکەى حکومەتى هەرێمى کوردستان وردەکاریى ئەو پڕۆژانەى تێدان، کە دەبوو لەسەر بودجەى پەرەپێدانى پارێزگاکان بکرێت، بەڵام نەکراون؛ نووسراوەکەى لیژنەى هەرێم و پارێزگاکانیش داواکاریى خەرجکردنى ئەو پارەیەیە لە سەر بنەماى سەردانێکیان بۆ هەرێمى کوردستان.