نرخی نەوت و زێڕ بەرزبووەوە

 

رۆژی رابردوو، دوای دابەزینی بەهای دۆلار بەرامبەر بە دراوەکانی دیکە، نرخی زێڕ ئاستی 1750 دۆلاری تێپەڕاند کە بە ئاستێکی هەستیار هەژمار دەکرێت و بە تێپەڕاندنی ئەو ئاستەش، پێشبینییەکان وان کە مەترسی لەسەر دابەزینی لە هەفتەکانی دیکەدا کەمتر دەبێتەوە.

 

ئەمڕۆ هەینی، 25-11-2022، نرخی هەر ئۆنسەیەک زێڕ بۆ گرێبەستەکانی داهاتوو بە 1759 دۆلار و 15 سەنت مامەڵەی پێوەکرا. نرخی زێڕیش بۆ گرێبەستەکانی ئێستا بە 1758 دۆلار و 90 سەنتە.

 

بەپێی راپرسییەکان، ئێستا بە رێژەی 80٪ـی چانسی ئەوە هەیە کە بانکی ناوەندیی ئەمریکا سوودی بانکی تەنیا بە رێژەی 50٪ بەرزبکاتەوە. لە چەند مانگی رابردوودا بانکی ناوەندی سوودی بانکی هەر جارێک بە رێژەی 0.75٪ بەرزکردبووەوە.

 

 

لە هەفتەی رابردوودا نرخی نەوت دابەزی، بەرەبەیانی ئەمڕۆ هەینیش دوای کردنەوەی بازاڕەکانی ئاسیا نرخەکەی بەرزبووەوە و هەر بەرمیلێک نەوتی برێنت بە 85 دۆلار و 73 سەنت مامەڵەی پێوەکرا، نرخی نەوتی سووکی رۆژئاوای تێکساسیش بە 78 دۆلار و 52 سەنت مامەڵەی پێوەکرا. 

 

بەرزبوونەوەی نرخی نەوت لەکاتێکدایە، بەپێی چەندین سەرچاوە لە یەکێتیی ئەوروپاوە، ئەندامانی ئەوروپی گرووپی حەوت بەنیازن نرخی نەوتی رووسیا لە نزیکەی 65 بۆ 70 دۆلار دابنێن.

 

بانکی (کامێن وێلس) لەو بارەیەوە رایگەیاند، هەرچەندە ئەو نرخەی لەسەر نەوتی رووسیا دانراوە نرخێکی بەرزە، بەڵام ئەوە دڵنیایی دەداتە بازاڕ کە نەوتی رووسیا بەردەوام دەبێت لە بازاڕدا و کەمیی خستنەڕوو روونادات.

 

هەرچەندە نرخی نەوت ئەمڕۆ کەمێک بەرزبووەتەوە، بەڵام لەسەر ئاستی گشتی بۆ ماوەی سێ هەفتەی لەسەر یەکە نرخەکان روو لە دابەزینن. 

 

 

100 دۆلار بەرامبەرە بە 148 هەزار و 750 دیناری عێراقی

 

یۆرۆ - دۆلار 1.04 EUR/USD

 

پاوەند - دۆلار 1.21 GBP/USD

 

دۆلار - لیرە 18.62 USD/TRY

 

یەک دۆلار - ریاڵ (تمەن) 35 هەزار و 300 تمەن USD/IRR

 

یەک دۆلاری ئەمریکی: 60.62 روبڵی رووسی