وەزارەتی دارایی: دابەشکردنی مووچەی خانەنشینان بە ئەلیکترۆنی هەموو هەرێمی کوردستان دەگرێتەوە

رۆژی هەینی، 24ـی شوباتی 2023، شۆخان عومەر، بەڕێوەبەری بانکی مەڵکەندی لە سلێمانی بە تۆڕی میدیایی رووداوی گوت: "ئەم مانگە سیستمی ئەلیکترۆنی مووچەمان بۆ خانەنشینان کارپێکرد و ئاسانکارییەکی زۆری بۆ خانەنشینان کرد. دۆخەکە بە جۆرێکە نۆرەگرتن و قەرەباڵخی نەماوە و هەر خانەنشینێک بە 43 چرکە مووچەکەی وەردەگرێت".

 

لە سنووری پارێزگای سلێمانی، 86 هەزار خانەنشینی مەدەنی هەن و بە گوتەی بەڕێوەبەری بانکی مەڵکەندی، نزیکەی 50 هەزاریان خراونەتە سەر بانکەکەی ئەوان. گوتیشی: "بە خانەنشینی سەربازییەوە ژمارەی خانەنشینانی پارێزگای سلێمانی دەگاتە 146 هەزار خانەنشین. لە بەرنامەماندایە هەموویان بخرێنە سەر بانکی مەڵکەندی و بەشێوەی ئەلیکترۆنی بە کارت مووچەکانیان وەربگرن".

 

مانگی 11ـی ساڵی رابردوو لە سلێمانی وەکو تێست دابەشکردنی مووچەی خانەنشینان تاقیکرایەوە، ئەم مانگە چووەتە بواری جێبەجێکردنەوە و شۆخان عومەر دەڵێت: "زۆر سەرکەوتوو بووە".

 

لەبارەی پارێزگاکانی دیکەوە، هەر ئەمڕۆ هەینی، هونەر جەمال، بەڕێوەبەری راگەیاندنی وەزارەتی دارایی و ئابووری هەرێمی کوردستان بە تۆڕی میدیایی رووداوی گوت: "پێدانی مووچە بەشێوازی ئەلیکترۆنی لە سلێمانی کەوتووەتە بواری جێبەجێکردنەوە؛ لە هەولێریش کۆمپانیا لەسەر هێڵە بۆ گرێبەست و لە ماوەکانی داهاتوودا گرێبەستیان لەگەڵ واژۆ دەکرێت".

 

لەبارەی پارێزگا و ئیدارە سەربەخۆکانی دیکە، بەڕێوەبەری راگەیاندنی وەزارەتی دارایی گوتی: "پاکێجەکەی پارێزگای سلێمانی پارێزگای هەڵەبجە و ئیدارەکانی گەرمیان و راپەڕینیش دەگرێتەوە؛ پاکێجەکەی پارێزگای هەولێریش کە خوێندنەوەی بۆ کراوە و کۆمپانیا لەسەر هێڵە بۆ گرێبەست واژۆکردن، پارێزگای دهۆک و ئیدارەکانی سۆران و زاخۆش دەگرێتەوە. ئامانجی ئێمە لە وەزارەتی دارایی ئەوەیە هەموو خانەنشینان مووچە بە سیستمی ئەلیکترۆنی وەربگرن".