وەزارەتی ناوخۆی عێراق: بەڵێننامە بە 18 هەزار شوێنی بازرگانی پڕکراوەتەوە مامەڵە بە دۆلار نەکەن

 

عەمید حوسێن تەمیمی، بەڕێوەبەری ئۆپەراسیۆنەکان لە بەڕێوەبەرایەتی تاوانی رێکخراو لە وەزارەتی ناوخۆی عێراق ئەمڕۆ (یەکشەممە، 22-10-2023) بە میدیای فەرمیی عێراقی رایگەیاند، بۆ پشتیوانی لە بەهای دیناری عێراقی، لە مانگی ئایاری رابردووەوە هەڵمەتێکیان دەستپێکردووە بۆ دەستگیرکردنی ئەوانەی یاری بە دینار و دۆلار دەکەن و دراوی بیانی بە قاچاخ دەبەن.

 

عەمید حوسێن تەمیمی روونیکردەوە، وەزارەتی ناوخۆ بەڵێننامەی بە خاوەن پێشانگەکانی ئۆتۆمبێل، شوێنەکانی فرۆشتنی کەرەستەی کارەبایی، کۆمپانیای گەشتیاریی، کۆفرۆشەکان، خاوەن کۆمەڵگەکانی نیشتەجێبوون پڕکردووەتەوە، لەکاتی کڕین و فرۆشتندا، مامەڵە بە دۆلار نەکەن، بەپێچەوانەوە رووبەڕووی لێپرسینەوەی یاسایی دەبنەوە، کە زیندانی و پێبژاردنی داراییە.

 

بەڕێوەبەری ئۆپەراسیۆنەکان لە بەڕێوەبەرایەتی تاوانی رێکخراو لە وەزارەتی ناوخۆی عێراق ئاشکرای کرد، لە مانگی ئایاری رابردووەوە تاوەکو ئێستا (تشرینی یەکەم)، وەزارەتی ناوخۆیی عێراق 17 هەزار و 900 بەڵێننامەی بە واژۆ و دەستخەتی خۆیان لە خاوەن شوێنە بازرگانییەکان وەرگرتووە کە لەکاتی کڕین و فرۆشتندا مامەڵە بە دۆلار نەکەن.

 

هەرچەندە بانکی ناوەندیی عێراق، دۆلارێک بە 1310 دینار بە بانک و بازرگانەکان دەفرۆشێت، بەڵام ئێستا یەک دۆلار لە بازاڕەکاندا بە نزیکەی 1600 دینار مامەڵەی پێوەدەکرێت.

 

بڕیار رەشید، ئەندامی لیژنەی ئابووری و پیشەسازیی و بازرگانی لە پەرلەمانی عێراق، ئەمڕۆ بە تۆڕی میدیایی رووداوی راگەیاند، کارکردن و مامەڵەکردن بە تەنیا دیناری عێراقی، یەکەم: پێویستی بە بڕیارێکی گشتگیرانە هەیە لە ئەنجوومەنی وەزیرانی عێراق و ئەنجوومەنی وەزیرانی هەرێمی کوردستان. دووەم: پێویستە بانکەکان ئاسانکاریی تەواو بکەن، تاوەکو بازرگانەکان بتوانن لە چوارچێوەی رێکار و رێنماییەکان لە زووترین کات، دۆلار بە نرخی فەرمی وەربگرن، بۆ پارەدارکردنە بازرگانییەکان نەوەک زۆر دوابکەون. 

 

بەگوتەی ئەندامەکەی لیژنەی ئابووری و پیشەسازیی و بازرگانی لە پەرلەمانی عێراق، ئێستا گرفتی سەرەکی لە بانکەکانە، کە بازرگاکان بەدەستیانەوە گرفتارن، چونکە بانکەکان ناتوانن بە تەواوی و لەماوەی دیارکراودا دۆلار بۆ بازرگانەکان دابینبکەن.