لیژنەی دارایی پەرلەمانی عێراق مادەیەکی لە بەشە بودجەی هەرێمی کوردستان پەسندکرد

نەرمین مەعرووف ئاشکرایکرد، ناکۆکى لەسەر چەند بڕگەیەکى مادەى 13 هەیە کە لایەنەکانى دیکە دەیانەوێت ناوى کۆمپانیاى بەبازاڕکردنى نەوتى عێراق (سۆمۆ) بخەنە نێو بڕگەى دووەمى مادەکە، وەک فرۆشیارى نەوتى هەرێمى کوردستان لەبرى وەزارەتى سامانە سرووشتیەکان و حکومەتى هەرێمى کوردستان، ئەوە جگە لە بڕگەیەکى دیکە کە دەیانەوێت ماوەى دانەوەى قەرزى بانکەکانى عێراق لەسەر حکومەتى هەرێمى کوردستان لە حەوت ساڵەوە بکەنە پێنج ساڵ. 

 

بەگوتەى ئەو ئەندامەى لیژنەى دارایی عێراق، یەکێکى دیکە لە خاڵە ناکۆکەکان لەبارەى پشکى هەرێمى کوردستان، لە بڕگەکانى مادەى 14 دایە، "دەیانەوێت مادەیەک زیادبکەن بەوەى لەبارى دروستبوونى کێشە لە جێبەجێکردنى رێککەوتنەکە بڕیارەکانى دادگەى باڵاى فیدراڵیى عێراق یەکلاکەرەوە بێت، هاوکات دەستەواژەیەک بۆ بڕگەى یەکەمى مادەکە زیادبکەن بەوەى هەژمارى هەڵگرتنى داهاتى نەوتى هەرێمى کوردستان لە بانکى ناوەندى بێت و وەزیرى دارایی عێراق لەبرى سەرۆکوەزیرانى عێراق، دەسەڵاتى سەرپەرشتیکردنى سەرۆکوەزیرانى هەرێمى کوردستانى هەبێت بۆ خەرجکردنى پارەکەى." 

 

پشکى هەرێمى کوردستان لە پڕۆژەیاساى بودجەى گشتیی عێراق زیاتر لە 16 ترلیۆن دینارە لە کۆى 199 ترلیۆن دینارى تێکڕاى پارەى پڕۆژەیاساکە کە بۆ ماوەى سێ ساڵە. 

 

بڕیارە ئەمشەو بۆ جارێکى دیکە لیژنەى دارایی لەبارەى یەکلاکردنەوەى ئەو مادانە کۆببێتەوە کە تایبەتن بە پشکى هەرێمى کوردستان.