پێشبینییەکی ئۆپێک نرخی نەوتی دابەزاند

 

رۆژی سێشەممە 15-11-2022 یەک بەرمیل نەوتی برێنتی دەریای باکوور 39 سەنت دابەزی و بە 92 دۆلار و 75 سەنت مامەڵەی پێوەکرا. هەروەها نرخی نەوتی سووکی تەکساسی ئەمریکا 56 سەنت دابەزی و بە 85 دۆلارو 31 سەنت مامەڵەی پێوەکرا.

 

رێکخراوی ئۆپێک بۆ پێنجەمین جارە لە مانگی 4 ی ئەمساڵەوە پێشبنییەکانی خۆی بۆ خواست لەسەر بەکارهێنانی نەوت کەمدەکاتەوە.

 

رێکخراوی ئۆپێک لە راپۆرتی مانگانەی خۆیدا رایگەیاند، خواست بۆ بەکارهێنانی نەوت بۆ ئەمساڵ 2 ملیۆن و 550 هەزار بەرمیل نەوت زیاد دەکات کە بە بڕی 100 هەزار بەرمیل کەمترە لە پێشبینییەکانی رابردووی خۆی.

 

ئۆپێک هۆکاری کەمبوونەوەی خواست بۆ بەکارهێنانی نەوت لەمساڵدا بۆ تەمومژاویی بوونی رەوشی ئابووریی جیهان و ئەگەری سستبوونەوەی ئابووریی ئەمریکا دەگەڕێنێتەوە.

 

بانکی ئۆسترالیی نیوزلەندی (ANZ ) سەبارەت بە بازاڕی نەوت رایگەیاند، " بازاڕی نەوت گوێی بەو مەترسییانە نەداوە کە پەیوەست بە کەمبوونەوەی خستنەڕووی نەوت بەتایبەتی لەو رووەوە کە وڵاتانی ئەوروپی هاوردەکردنی نەوتی رووسیا قەدەخەدەکەن."

 

 

رۆژی سێشەممە نرخی زێڕ لە نزیک بەرزترین ئاستەکانی 3 مانگی رابردووی خۆی مامەڵەی پێوەکرا و ئێستا نرخی هەر ئۆنسەیەک زێڕ لە نزیکەی 1770 دۆلار بە جێگری مایەوە.

 

بازرگانانی زێڕ هیوادارن کە لە مانگی داهاتوو بانکی ناوەندیی ئەمریکا بە رێژەیەکی کەمتر سوودی بانکی بەرزبکاتەوە.

 

زۆربەی شرۆڤەکاران پێیانوایە کە بانکی ناوەندیی ئەمریکا لە جیاتی ئەوەی بە رێژەی 0.75٪ سوودی بانکی بەرزبکاتەوە تەنیا 0.5٪ سوودی بانکی زیاد دەکات.

 

لەلایەکی دیکەوە لایل برەینارد، جێگری سەرۆکی بانکی ناوەندیی ئەمریکا رایگەیاندووە کە بەم زووانە کاتی ئەوە دێت کە بانکی ناوەندی سیاسەتی بەرزکردنەوەی سوودی بانکی خۆی بووەستێنێت.

 

هاوکات گەورەترین سندووقی وەبەرهێنان لە زێڕ لە جیهاندا کە بە SPDR ناسراوە رایگەیاندووە کە قەبارەی یەدەکی زێڕی سندووقەکە بەرزبووەتەوە بۆ 910 تۆن و 410 کیلۆ و بەو پێیەش کڕینی زێڕ لەلایەن گەورەترین سندووقی وەبەرهێنان بە کانزای زەرد زیادیکردووە.