لە رانیە گوێزی خراپبوو رەنگکراوە و بە نرخی فستق فرۆشراوە

 

رۆژی هەینی، 4-11-2022، لیژنە ھاوبەشەكانی قایمقامیەتی قەزای رانیە لە راگەیێندراوێکدا بڵاویکردەوە: "دوای پشكنینی كارگەكانی دروستكردنی شیرینی، ھەستكراوە بە دیاردەی رەنگكردنی گوێزی ھاڕدراو و فرۆشتنی بە نرخی فستق كە ئەمەش دەبێتە ھۆی فێڵكردن لە ھاونیشتمانییان".

 

کارزان سلێمان، سەرۆکی لیژنە هاوبەشەکانی قایمقامیەتی رانیە بە تۆڕی میدیایی رووداوی گوت: "ئەو کارگانە گوێزی خراپ بوو، عەلی بابا و گوێزی هیندیی رەنگکراویان بە ناوی فستقەوە لەنێو شیرینی و پاقلاوەدا بەکارهێناوە و بە هاونیشتمانییانیان فرۆشتووە".

 

سەرۆکی لیژنە هاوبەشەکانی قایمقامییەتی رانیە گوتیشی، ئەوەی کراوە زیانی تەندروستی بۆ هاونیشتمانییان دەبێت و لەبەرئەوە رێنماییان داوەتە کارگەکان و لێیان قەدەخەکردوون؛ هەر کارگەیەک پابەند نەبێت، رێکاری یاسایی بەرامبەر دەگرنەبەر.