لەبارەی دەستپێکردنەوەی هەناردەکردنی نەوت 'ئەگەری رێککەوتنی خێرای هەولێر و بەغدا' هەیە
رووداو دیجیتاڵ
بە بڕوای کۆمپانیا نەوتییەکان، ئەگەری زۆرە بە خێرایی رێککەوتن لە نێوان هەردوو حکومەتی هەرێمی کوردستان و حکومەتی عێراق بێتە ئاراوە.
شرۆڤەکاران و بەڕێوەبەرانی کۆمپانیا راوێژکارە نێودەوڵەتییەکان لەبارەی دانووستاندنەکانی نێوان دوو حکومەتی هەرێمی کوردستان و حکومەتی عێراق دەڵێن دەرفەتێکی گەورەی سازکردن لە نێوانیاندا هەیە.
ریچارد برۆنز، شرۆڤەکاری وزە سەر بە کۆمپانیای ئەسپێک ئێنێرجی دەڵێت، پەیوەندیی حکومەتی هەرێمی کوردستان لەگەڵ حکومەتی محەممەد شیاع سوودانی پەیوەندییەکی باشە و تەنانەت پێش راگەیاندنی بڕیاری دادگەی نێودەوڵەتیی نێوبژیوانی، دانوستاندن لە نێوان دوو حکومەتدا هەبووە لەسەر ئەو بابەتە.
ریچارد دەڵێت، زووتر لەو کاتەی کە پێشبینی دەکرێت، دەرفەتی رێککەوتن لە نێوان حکومەتی هەرێمی کوردستان و حکومەتی عێراق هەیە و ئەگەری هەیە هەناردەکردنی نەوت لە بەندەری جەیهانەوە بەمزووانە دەستپێبکاتەوە.