Wezîrê Tenduristiyê yê Portekîzê: Cîhan ji bo têkoşîna li dijî pandemiyeke nû amade ye

23-09-2023

Wezîrê Tenduristiyê yê Portekîzê Manuel Pizarro ji Rûdawê re ragihand ku cîhan ji bo têkoşîna li dijî pandemiyeke nû amade ye.

Manuel Pizarro bal kişand ser wê yekê ku bernameya "Armancên Pêşketina Berdewam" ji bo her kesî pir girîng e.

Pizarro got ku civînên Neteweyên Yekbûyî yên ku îsal hatin kirin “di pêvajoyek pir girîng de civînek mezin bû ji ber ku em neçar man ku piştî Covid-19 di civaka navneteweyî de hevgirtinê ji nû ve ava bikin.”

Pizarro diyar kir ku divê welatên cîhanê di warê tenduristî û dermankirinê de bibin xwedî derfetên wekhev û “Divê tu kes bi tenê neyî hiştin.”

Wezîrê Tenduristiyê yê Portekîzê Manuel Pizarro li Civata Giştî ya Neteweyên Yekbûyî ya li New Yorkê bersiva pirsên Nûçegihanê Rûdawê Sînan Tuncdemîr da.

Rûdaw: Wekî ku hûn dizanîn 78emîn Civîna Lijneya Giştî ya Neteweyên Yekbûyî dest pê kir. Hûn van rûniştinan çawa dinirxînin? Ma hûn difikirin ku ew li ser mijarên germ ên cîhanê diaxivin?

Manuel Pizarro: Bi dîtina min di pêvajoyeke pir girîng de hevdîtineke mezin e ji ber ku em neçar man ku piştî Covid-19 di civaka navneteweyî de hevgirtinê ji nû ve ava bikin. Ji ber vê yekê bernameya 'Armancên Pêşkeftina Berdewam' ji bo her kesî pir girîng e.

Rûdaw: Di derbarê Covid-19ê de, hûn difikirin ku Rêxistina Tenduristiyê ya Cîhanê amade ye ku bi şepoleke nû an pandemiyeke nû re rû bi rû bimîne?

Manuel Pizarro: Ez bê guman piştrast im ku em niha ji sala 2020an ku dema Covid belav bû pir çêtir amade ne. Lê her tim gelekî tişt hene ku bê kirin. Di heman demê de, divê em ji bîr nekin ku rewş welat bi welat û heta herêm bi herêm di nav heman welatî de diguhere. Pirsgirêka wekheviyê ji bo gihîştina xizmetên tenduristiyê pir girîng e.

Rûdaw: Peyameke we ji bo cîhanê heye, di nav de mijara wekheviyê jî ku hûn bi taybetî tekez dikin? Hûn dizanin, dema derziya koronayê hat dîtin, têra tevahiya cîhanê nekir bi taybetî ji bo welatên hejar. Di vê mijarê de pêşniyarên we hene? Ji bo wekheviya ku we behs kir divê çi bê kirin?

Manuel Pizarro: Bê guman ez ji beşeke cîhanê û ji beşeke bi dahata bilind a Ewropayê têm. Me bi hev re pirsgirêk çareser kirin, lê fikra bi hev re ji bo pêşerojê tiştek pir girîng e û divê em bi hev re bimînin û li çareyan bigerin û alîkariya her kesê li cîhanê bikin. Divê tu kes bi tenê neyê hiştin.