Neteweyên Yekbûyî: Xelk ji ber şerê li Bendava Tişrînê bê av e

RÛDAW

Hewlêr (Rûdaw) Berdevkê Sekreterê Giştî yê Neteweyên Yekbûyî (NY) Stephane Dujarric bal kişand ser rewşa şerê li Bendava Tişrînê û diyar kir ku 403 hezar kes li Minbic û Kobaniyê bê av in.  

Stephane Dujarric amaje bi rewşa tenduristiyê ya Kampa Holê ya li Rojavayê Kurdistanê jî kir û da zanîn ku heta niha gelek herêm li Sûriyeyê ne ewle ne.

Berdevk bal kişand ser êrişên komên çekdar ên Artêşa Niştimanî yên nêzîkî Tirkiyeyê ne û da zanîn ku li derdora Bendava Tişrînê bendav kar nake û xelkê hêrêmê ji ber kêmbûna avê dinale.

“Li Kampa Holê kampanyaya vaksînkirinê dest pê kiriye”

Stephane Dujarric behsa xebatên li Kampa Holê kir û got:

"Li bakurê rojhilatê Sûriyeyê, li ser asta mirovî Rêxistina Tendirustiyê ya Cîhanî (WHO) û hevbeşên xwe kampanyayeke serkeftî ya vaksînkina kolerayê li Kampa Holê ji bo ji kesên yek salî û bi jor de pêk anî.

Hevalên me yên di warê mirovî de kar dikin dibêjin heta niha rewşa ewlehiyê li çend herêmên Sûriyeyê ne aram e.

Şer û pevçûnên li parêzgeha Helebê bandorê li herêm û derdora Bendava Tişrînê dikin ku 35 roj in kar nake.

Her wiha zêdeyî 403 hezar kes li bajarên Minbic û Kobaniyê ji ber kêmbûna avê zehmetiyan dikişînin.

Li Dêrezorê jî piraniya gundên li aliyê rojhilat ji ber kêmbûna santralên avê ji ber kêmbûna vexwarina avê dinalin."