Êrişî alîgirên Amedsporê hat kirin: 2 kes birîndar bûn
Hewlêr (Rûdaw) – Li Stenbolê hinek alîgirên Sariyerê, êrişî malbateke piştevanên Amedsporê kir û 2 kes birîndar kirin.
Ti lîstikeke tîma Amedsporê ya li gel tîmên bajarên Tirkiyeyê bê alozî derbas nabin.
Careke din tîma Amedsporê rastî binpêkarî û pirsgirêkan hat.
Polîsan nehişt alîgirên Amedsporê derbasî stadyumê bibin
Duh li Stenbolê her du tîmên lîga duyem Amedspor û Sariyer lîstin lê polîsan nehişt ku alîgirên Amedsporê derbasî nava stadyumê bibin.
Lîstik bi encama yek bi yek temam bû.
2 kes birîndar bûn
Li derveyî stadyumê jî hejmareke alîgirên Sariyerê êrişî malbateke piştevanên Amedsporê kir û du kes birîndar kirin.
Zarok jî bi malbatê re bûn lê êrişkaran guh neda wê yekê.
Rahênerê Amedsporê Sedat Bozkurt diyar kir ku wan lîstikeke baş kir û got:
“Derfetên me yên baş hebûn lê me ji dest dan. Ez dikarim bêjim ku me serkeftin ji dest da.
Astengiya herî mezin jî çîmê sahê bû. Ez nizanim, we dîmen girtin û we nîşan da yan na? Divabû ev lîstik li stadyumeke wiha xirab nehata kirin.
Çîmê wê nehatibû qutkirin û nehatibû rastkirin. Dibe ku bi zanebûn jî ev yek kiribin."
“Em rastî gelek pirsgirêkan hatin”
Rêveberê Werzişê yê Amedsporê Murat Yigiter derbarê lîstikê de got:
"Çend tiştên zêde çêbûn. Hejmareke zêde ya alîgirên me hatibûn daku li lîstikê temaşe bikin lê mixabin ji ber kluba Sariyerê nexwest, hêzên ewlehiyê nehişt ku derbasî nava stadyumê bibin.
Em rastî gelek pirsgirêkan hatin lê tevî vê yekê jî em dê li ser rêya xwe berdewam bin."
Alîgirên tîma Amedsporê, ji ber qedexeyê ev heft sal bûn ku nedikarin li stadyumên derveyî Amedê piştîvaniyê li tîma xwe bikin.
Di meha gulana îsal de qedexeya çûna alîgirên Amedsporê bo stadyumên derveyî Amedê hat rakirin.
Rakirina qedexeya li ser alîgirên Amedsporê zêde dirêj nekir û careke din di lîstika duh a li Stenbolê de, alîgirên wê tîma Bakurê Kurdistanê rastî rêgirî û binpêkirinan hatin.