Benzema û Kante ji bo lîstika Lîga Şampiyonan dê werin Hewlêrê
Hewlêr (Rûdaw) – Tîma Îtihadê ya Erebistana Siûdiyê dê roja şemiyê ji bo sêyemîn lîstika xwe ya Lîga Şampiyonan a Asyayê ya bi tîma Cewiyeyê ya Îraqî re were Hewlêrê.
Tîma Îraqî ji Tora Medyayî ya Rûdawê re ragihand:
“Pasaportên Karim Benzema û N'Golo Kante ji me re hatiye da ku em vîzeyê ji wan re wergirin.”
Lîstika tîmên Îtihad û Cewiyeyê dê 6ê Çiriya Paşînê li Yarîgeha Franso Herîriyê were lîstin û Ehmed Ebûbekirê Umanî dê bi rê ve bibe.
Şandeya 75 kesî ya tîma Îtihadê dê bi balafireke taybet bigihe paytexta Herêma Kurdistanê û hemû amadekarî ji bo pêşwazîkirina şandeyê hatine kirin.
Endamên tîma Îtihadê dê li Dîvan Hotelê ya Hewlêrê bimînin.
Endamê Desteya Rêveber a tîma Cewiyeyê Elî Mensûr ji Rûdawê re ragihand:
“Me hemû amadekariyên xwe ji bo mazûvaniya tîma Îtihadê bi alîkariya Rêveberê Giştî yê Werzişê ya Kurdistanê û Parêzgarê Hewlêrê temam kirine.
Em dikarin li Hewlêrê bi awayekî herî baş mazûvaniya stêrkên cîhanê bikin.”
Ji ber Benzema lîstikê bal kişandiye ser xwe
Lîstika Îtihad û Cewiyeyê ji ber hebûna stêrkê Fransî Karim Benzema bala werzişa Îraq û Herêma Kurdistanê kişandiye ser xwe.
Endamê Desteya Rêveber a tîma Cewiyeyê Elî Mensûr herwiha got:
“Karim Benzema û N'Golo Kante pasaportên xwe ji me re şandin da ku em vîzeyê ji wan re bistînin. Tê çaverêkirin ku Benzema û Kante beşdarî lîstikê bibin.”
Ev çend roj in ji bo amadekirinê li Yarîgeha Franso Herîriyê kar û xebat berdewam in da ku hemû hewcedariyên navneteweyî ji bo lîstikê werin bicihkirin.
Di Koma Cyê ya Kûpaya Şampiyonan a Asyayê de Cewiyeya Îraqî dê bi Îtihada Erebistana Siûdî re, Sipahan Îsfehana Îranê jî bi Olmalîka Ozbekistanî re bilîze.