Erdogan: Em bangî Qendîlê nakin!
Hewlêr (Rûdaw) - Recep Tayyîp Erdogan got ku ew ji bo “pêvajoya aştiyê” bangî Qendîl û Rojavayê Kurdistanê nakin.
Serokkomarê Tirkiyeyê Recep Tayyîp Erdogan di civîna koma AK Partiyê de axivî.
Serokê Giştî yê MHPyê Devlet Bahçelî 1ê vê mehê silav da DEM Partiyê û 22yê mehê jî got ku bila Abdullah Ocalan li Parlamentoya Tirkiyeyê biaxive PKKyê tasfiye bike.
Erdogan ji bo van tevger û daxuyaniyên wî spasiya Bahçelî kir û got:
“Ez li ser navê gelê xwe yê ezîz spasiya MHP û rêhevalê me yê Tifaqa Cumhurê Birêz Bahçelî dikim.
Wî bi awayê herî zelal nîşan daye ku hezkirina milet û welat çi ye.”
“Em bi ti awayî bangî Qendîlê nakin”
Erdogan amaje pê kir ku ew bi ti awayî bangî Qendîlê nakin û li pey çû:
“Em dê li nava Tirkiye, Îraq û Sûriyeyê têkoşîna xwe ya bi terorê re bi awayekî bibiryar bidomînin û tehdîd ji kû derê were em dê ji holê rakin.
Teror û siyaset, şidet û û demokrasî nayên kêleka hev.”
“Kurd û Tirk nikarin bêyî hev bijîn”
Recep Tayyîp Erdogan gotina Bahçelî ya bi rengê “Ferza dînî û siyasî ye ku Kurd û Tirk ji hev hez bikin” bi bîr anî û li pey çû:
“Kurd û Tirk nikarin bêyî hev bijîn. Di artêşa Alparslan de Kurd û Tirk û Ereb jî hebûn. Malazgîrt serkeftina hevpar a Kurd û Tirkan e.”
“Me komar bi hev re ava kir”
Erdogan anî zimên ku “gavên Bahçelî” derfeteke dîrokî ne û got:
“Birayê min ê Kurd, em ji te hêvî dikin ku tu vî destî ji dil û can bigirî.
Me komar bi hev re ava kir û ev komar a te ye jî. Were em dê bikin welatê dilxweşiyê û em ên ku kulmên xwe şidandine ji navberê derxin.”
Ahmet Ozer
Divê were gotin ku Serokê Şaredariya Esenyurtê Prof. Dr. Ahmet Ozer vê sibehê hat desteserkirin.
Erdogan ev yek jî parast û got, “Dema endamên rêxsitina terorê Esenyurtê dişewitînin divê tu ji vê (ji desteserkirina Ahmet Ozer) aciz nebî. Em dev ji van gavên xwe bernadin.”