Li Îzmîr û Mêrsînê 55 koçber hatin desteserkirin
Hewlêr (Rûdaw) - Li herdu bajarên Îzmîr û Mêrsînê yên Tirkiyê 55 koçber yên ku dixwestin bi rêyên qeçax derbasî welatên Ewropayê bibin hatin desteserkirin
Li peravên bajarokê Karaburunê yê Îzmîrê, di nav belemeke lastîkî de 34 koçber ji aliyê hêzên Ewlekariya Peravan ve hatin desteserkirin. Li gor agahiyên hatine belavkirin, 11ê Adarê li peravên Karaburunê belemeke ku 34 koçber têde bûn, ji ber rewşa xirab a keş û hewayê ji derb dikeve.
Li ser agahdarkirina aliyên peywendîdar, hêzên Ewlekariya Peravan diçin cihê bûyerê û 34 koçberan ji nav deryayê derdixin. Hat ragihandin ku piştî kar û barên yasayî her 34 koçber bo Îdareya Koçê ya Bajêr hatine radestkirin.
Li aliyê din li peravên bajarokê Anamurê yê Mêrsînê jî 21 koçber hatin desteserkirin. Li gor daxuyaniya ku ji aliyê Fermandariya Ewlekariya Peravan ve hatiye belavkirin, li ser zanyariyên ku li peravên Anamurê hinek koçber di nav belemekê de ne, hêzên ser bi fermandariyê dikevin tevgerê û 21 koçberan desteser dikin.