Parlementeriya Ferhat Encu hat betalkirin

RÛDAW

Navenda Nûçeyan – Parlementeriya Parlementerê HDPê yê Şirnexê Ferhat Encu hat betalkirin.

 

Bi tohmetên “reşkirina leşkeriyê li ber çavê xelkê, propagandaya rêxistina terorê, tehrîkkirina xelkê ber bi kîn û dijminahiyê, têketina herêmên leşkerî yên qedexekirî, hewldana ji bo kuştina peywirdarekî hikûmetê” li dijî Parlementerê HDPê Ferhat Encu doz hatibû vekirin.

 

Dadgehê li ser tohmetên derbarê Ferhat Encu de di 9ê Hezîranê de biryara 4 sal û 7 meh zindanîkirinê da.

 

Parlementoya Tirkiyê jî biryara tekez a dadgehê weke sedemek nîşan da û parlementeriya Ferhat Encu betal kir.

 

Berî niha parlementeriya Hevseroka berê yê HDPê Figen Yuksekdag, Parlementerê Wanê Tugba Hezer, Parlementerê Sêrtê Besime Konca, Parlementerê Şirnexê Faysal Sariyildiz, Parlementerê Amedê Nursel Aydogan û Parlementerê Agiriyê Leyla Zana hatibû betalkirin.

 

Partiya Demokratîk a Gelan (HDP) di hilbijartinên 1ê Mijdara 2015an de 59 kursî bi dest xistibûn.

 

Piştî ku parlementeriya Ferhat Encu jî hate betalkirin, tevî hevserokê HDPê Selahattin Demirtaş û 9 parlementerên din ên girtî, hejmara parlementerên HDPê yên li Parlementoya Tirkiyê dakete 52 kesan.