Li Tirkiyê û Bakurê Kurdistanê alkol ji sedî 25 hat bihakirin

Ferdî Sak

Hewlêr (Rûdaw) - Li Bakurê Kurdistan û Tirkiyê nirxê alkolê ji sedî 25 û nirxê piskiwêt û şeklameyan jî ji sedî 15 hatin bihakirin.

Bi daketina nirxê lîreyê Tirkî li hember dolar û diravên biyanî li Bakurê Kurdistan û Tirkiyê bihabûna nirxan berdewam e.

Piştî bihakirina nirxê petrol, cigare û nan, Serokê Komeleya Hevkariya Bikomfiroşên Tekelê Erol Dundar roja Sêşemê 4ê Temûza 2023an li ser hesabê xwe yê medyaya civakî lîsteyeke vexwarinên alkolê belav kir û ragihand ku nirxê berhemên grûba Perno yên vexwarinên alkolê ji sedî 25 hatiye bihakirin.

Li gor lîsteya ku Dundar belav kiriye, nirxê vodka, wîskî, tekîla, şampanya û martînî bi rêjeya ji sedî 25 hatine bihakirin. 

Tê pêşbînîkirin ku nirxê vexwarinên din ên alkolê di serî de bîra bi rêjeyên bilind bên bihakirin.

 

Herwiha ji bilî alkolê nirxê piskwêt û şeklameyan jî bi rêjeya ji sedî 15 hatin biharkirin.

Daketina nirxê lîreyê Tirkî li hember dolar û diravên biyanî berdewam e. Bi awayekî piştî hilbijartinên giştî yên 14 û 28ê Gulanê lîreyê Tirkî ji zêdeyî ji sedî 28 nirxê xwe ji dest daye.

Daketina nirxê lîreyê Tirkî sedema sereke ya bilindbûna rêjeya enfilasyon û bihabûnan e. Hikûmeta Tirkiyê hewil dide bi zêdekirina mûçeyan rê li ber daketina hêza kirînê ya welatiyan bigire, lê ji ber daketina berdewam a nirxê lîreyê Tirkî û enfilasyonê ew beşa mûçeyê ku tê zêdekirin berî ku bikev berîka welatiyan dihele.